Bon Dia a sinta cu Psycholoog Dimitri Halley kende for di un perspectiva di un psycholoog ta bisa cu bo por nabega e tema di e amienda di union civil den forma legal of religioso, sinembargo den e manera aki bo ta perde un tiki riba locual ta e parti psicologico y spiritual di dje.
”E problema ta bira e ora ey cu nos ta keda enfatisa nos pensamento riba kico estadistica ta bisa of hasta kico e opinion publico ta. Eigenlijk esaki no mester bira e base di bo pensamento, mester bay mas profundo pa yega na algo mas principal pa guia bo pensamento pasobra si bay solamente segun estadistica ta bisa, esey semper ta cambia”, Sr. Halley ta bisa.
Segun Sr. Halley, e ”hungadonan” den e wega aki a busca un compromiso den esaki den e sentido cu e ta djis un contract pa salvaguardia cierto derechonan anto no un matrimonio. ”Mi punto ta cu tur dos ta superficial ainda pasobra, bo por regla algo pa contract, nada contra, sinembargo esaki ta situacion awo caminda ta enfatisa riba un matrimonio mas externo en bes di uno interno. Ami ta mas interesa den e ”paden” di un persona pa locual ta mi trabao, y mi ta pensa cu e matrimonio di iglesia tambe no ta un matrimonio. Matrimonio entre homber y muhe na misa ta basa riba scritura unda ta para cu locual Dios ta uni, hende no por separa. Si esey tabata e caso, no lo tabata tin 90% di divorcio” , Sr. Halley ta splica Bon Dia.
Sr. Halley ta sigui bisa cu scritura tabata referiendo na algo hopi mas profundo cu hasta un ”contract” entre homber y muhe. ”Mester interpreta esaki riba un nivel mas profundo, esaki tabata kemen cu e conexion ey ningun hende of nada por kibra esey, pasobra e ta un union den bo anto ora bo kibra esaki, abo ta haya e consecuencianan. Esey tabata e conocemento di mas grandi cu a wordo malinterpreta.” Sr. Halley ta bisa.
Un pida papel no ta regla e union berdadero entre dos hende
Segun Sr. Halley, ora ta papia di un tema manera esaki y pa bay mas profundo pa locual ta union entre dos persona, si bo no tin un bon union di paden di bo mes, esaki no por ta bon di pafo tampoco. ”Den misa, tanto bal bo ta casa hende si nan mes individualmente no tin un union interno, ta bay sigui tin locual nos ta mira e cantidad di divorcio pasobra esaki no ta salvaguardia algo mas profundo fuera di beneficionan material”, Sr. Halley ta bisa.
Ora cu bo tin un union den bo mes, cu bo ta den balans y bo ta stima bo mes, no ta importa cu ken bo ta ,esaki lo ta sigur di bay positivo specialmente si tur dos den e relacion ta den balans cu nan mes. Esaki ta nifica pa siña controla nos emocionnan, nos pensamento y con nos ta trata cu tur otro hende no ta importa ken nan ta of for di unda nan ta bin. Segun Sr. Halley, esaki ta e tipo di combersacion cu e kier inspira pa no solamente enfatisa riba e parti material di e asunto aki pasobra obviamente tin hopi mas cu esey.
