Psycholoog, Dimitri Halley: ”Na Aruba no tin cuido adecuado pa trata hende cu problema mental”

Segun diferente informacion di husticia, Dyron Franken di 23 aña di edad cu a wordo tira mata Dialuna marduga na Noord, tabata basta conoci den area di Noord y tabata terorisa e area pa basta tempo. Recientemente diferente video tabata circulando riba internet tambe na unda por mira e hoben ta expresa su mes verbalmente  cual a pone hopi hende pensa cu tin algo robes cu e hoben segun e comentarionan riba e video.  

Segun un acto -prima di e difunto Dyron, poco aña pasa el a haya un sorto di ataca pa motibo di un overdosis y el a keda cu un problema severo mental. E tabata tur dia riba medicamento y tabata haci cosnan awe anto mañan e no tabata corda nada. Segun e prima ningun instancia no tabata kier a reconoce su problema pa motibo cu nan a djis pensa cu tabata e droga y no a worry mucho mas cun’e.

E ta agrega cu nan a mande Venezuela cu propio recurso anto esaki no a yuda mucho tampoco.
Despues di a wordo trata na Venezuela, e la bin bek poco mas calma pero esaki no a dura mucho.

E famia a acerca gobierno, purba varios biaha via polis bao curatela pero mucho no por a wordo haci.
Segun e prima ta conta Bon Dia e no tabata den un gang pero e tabata cana cu hende robes pa motibo tambe cu e tabata un persona hopi social y tabata tene amistad cu tur hende. Pa yega mas facil na droga, locual obviamente tabata su escape, e tabata rondona su mes cu cierto hende di mal influencia.

Ora cu e tabata tuma medicamento, su prima ta sigui splica, e tabata bira hopi agresivo y tabata busca problema den bario. Hopi hende a yega di core cun’e te hasta tabata tin menasa riba su bida.

E problema aki ta uno hopi bieu
Bon Dia a sinta cu Psycholoog Dimitri Halley kende ta splica cu e tipo di problemanan aki no ta nada nobo.

” E cuido di adiccion no ta bay suficientemente profundo pa yega na e origen di e problema”
Halley ta conta Bon Dia. E tipo di casonan aki ta wordo trata hopi superficialmente segun Halley, por ehempel nan ta hiba e hendenan un centro di rehabilitacion y spera cu esaki por ta e solucion concreto. Desde un punto di bista di un Psycholoog cu a traha hopi aña den e tereno aki, ta tristo pa mira con e tipo di problemanan aki ta keda escala y bira pio cada biaha.

”Bo por purba cambia sentimentonan pero si bo no analisa for di unda e traumanan ta bin, e problema ta keda bin bek ni kico cu bo haci. Hopi di e hobennan aki tin dolor, y nan ta uza droga manera un escape pa verdoof e dolor emocional” Halley ta conta Bon Dia.

Halley ta sigui splica cu nos instancianan ta haciendo un bon trabao pa locual ta ofrece informacion y conscientisacion pa locual ta consecuencianan di adiccion, pero mester compronde segun Halley cu ofreciendo informacion so no ta e solucion, mester purba di bay un tiki mas profundo pa locual ta e psicologia y confronta e problemanan di mas scur y mas scondi den e mente humano.

E ta agrega cu comunidad mester siña scucha nos hobennan mas miho ora cu nan ta actua y papia di tal forma, pa en bes di benta nan den isolacion of ataca nan, purba di bay na unda e problema aki por a cuminsa y traha hunto cu e hoben pa yega na un miho solucion pa mehora.

Investigacion ta andando pa mira kico exactamente a pasa Dialuna anochi cu Dyron.
Di parti di team di Bon Dia Aruba nos kier a manda nos sincero condolencia na famianan y sernan keri di e difunto Dyron Franken.