Psycholoog, Dimitri Halley ta conta Bon Dia cu actualmente por mira diferente incidente sosodiendo na Aruba pa locual ta abuso contra hende muhe y mucha cu awor ta parce cu a cuminsa bini for di tur banda. A bira importante pa pone un luz riba esaki segun sr. Halley pasobra el a cuminsa bira un epidemia rond di mundo y te hasta awor aki na Aruba mes.
”Awo cu nos tin camara pa tur cos, ta awo e ta wordo filma y nos por mira un spiel riba e cos aki. Pero e situacion aki no ta di aworaki so, for di hopi tempo caba nos ta biba den un cultura di abuso” , sr. Halley ta conta Bon Dia. sr. Halley ta splica cu actualmente bo por mira mas y mas con e cultura ta bendiciona of cubri e abuso di hende muhe y mucha. Esaki segun sr. Halley ta un programacion basta profundo cu nos ta bibando den dje. Segun sr. Halley, ora bo pasa den abuso, bo ta pasa den trauma nan profundo cu ta crea problema nan mental y esaki ta e base di controla hende su mente.
”Iglesia a hunga un rol fatal riba e tereno aki. Iglesia no kier ni combersa riba e topico aki. E rol di muhe den misa, den bijbel , ta fatal. Semper hende muhe a haya culpa di tur cos, anto ta p’esey for di chikito bo ta wordo programa pa pensa por ehempel cu e hende muhe ta inferior”, sr. Halley ta bisa.
Abuso contra hende muhe
sr. Halley ta conta Bon Dia cu te awe na scol bo por mira con nan ta papia cu e hende muhe ta mas emocional cu e hende homber y henter e enseñansa riba e diferencia nan entre hende muhe cu hende homber ta eigenlijk prehuicio y programacion mental contra e ser femenino. ”Nos tin un cultura practicamente cu ta acepta abuso sexual. Tin un caso na Standford University cu mester wordo mira di cerca unda un homber a abusa sexualmente di un hende muhe anto e tata di e homber a bisa ”Pakico daña e carera di su yiu pa via di 20 minuut di accion?”. Con un tata por papia asina? Nos ta den un cultura caminda awo hasta abuso sexual ta wordo mira como si fuera den un of otro manera, e hende muhe lo a pidi pa esaki” , sr. Halley ta splica.
sr. Halley ta splica cu mayoria di biaha ta trata cu caso nan di abuso contra hende muhe como si fuera ta su caracter no ta bon y ta e mes ta pidi pa wordo abusa den cualkier manera. E punto ta, segun sr.Halley, imagina bo ta pasa 1 aña den corte unda cu hende muhe mester splica su mes cu e no a pidi pa e cos nan aki pasa cun’e. Tin un mancha scur unda e hende muhe ta wordo abusa y destrui como si fuera esaki mag, anto e cos aki ta bay bek hasta den nos programacion y educacion na scol. Bo ta wordo programa pa crea e conflicto aki den e manera cu nos ta trata cun’e. Un ehempel, pakico te awendia no mag di tin pastoor muhe of un papa muhe? Pues e homber ta mas apto pa un posicion asina ki cu un muhe? E ta un tipo di programacion cu nos mester cuminsa presta atencion na dje”, sr. Halley ta splica Bon Dia.
Abuso contra mucha nan
Abuso contra mucha ta probablemente segun sr. Halley un di e problematica di mas grandi den nos sociedad cu nos ta keda ignora. ”Den casi cada organisacion local bo por mira cu tin caso di abuso sexual of domestico anto no tin caminda pa bay pa e hende nan aki. Si bo hefe ta e abusado, ta na unda bo ta bay? Nos tin un problema grave aki nan unda tin situacion nan constante di abuso di tur tipo cu no ta wordo resolvi.” sr. Halley ta bisa.
sr. Halley ta agrega cu sociedad no kier reconoce e problematica aki anto ta keda bin cu diferente excuus lubidando cu e daño por ta permanente. ”E mucha nan aki ta wordo traumatisa pa resto di nan bida, e daño ta sumamente teribel. Bo ta destrui un personalidad pa resto di su bida y p’esey ami ta kere cu no tin un bon evaluacion di e daño y p’esey tambe no tin straf pa e cos ki. Mas bo bay den e circulo nan mas grandi, mas bo ta haya esaki. Den iglesia por ehempel nan ta pone nan propio comision nan pa investiga nan propio pastoornan, pero con bo ta bay investiga bo mes? E cos aki nunca ta bin ariba asina ki” . sr. Halley ta bisa.
sr. Halley ta bisa cu ora bo wordo abusa como mucha, mayoria di biaha bo no ta ni corda pasobra e ta algo cu bo a sconde den bo inconsciente. ”Ora cu nos cuminsa den un di e cosnan cu mi ta haci den mi trabao , por ehempel como ”Dreamwork” caminda mi ta yuda bo interpreta e simbolo nan cu ta aparece den bo soño nan, tur e problema nan aki ta bini bek ariba for di e mente inconsciente. E ora ey bo ta bay wak cu, mi no ta gaña bo, hende lo spanta pa haya sa con halto e porcentahe di e tipo di caso nan aki ta. P’esey nos como sociedad tin miedo pa wak e problema aki pasobra e por ta hopi mas grandi di loke nos ta kere” , sr. Halley a bisa.
