Psicologo Robert Leal: ‘Stop violencia den situacion actual’

Comunidad ta pasando den momentonan dificil pa motibo di e pandemia di coronavirus. Tin hende cu a keda sin trabou y muchanan no ta bayendo scol pa motibo cu a cera. Esey ta pone cu famia ta keda mas tempo hunto na cas, cu ta pone situacion tenso.

Psicologo Robert Leal ta duna conseho na comunidad pa famia cu ta pasando den e situacion aki. E ta duna di conoce cu no ta un secreto cu pa hopi aña den mundo no a conoce un situacion manera esun cu nos ta bibando actualmente, ‘pero esaki ta realidad y tin cu cuida y yuda otro’.

Conseho di Leal ta cu mester tin e pasenshi presente. Sinembargo, pa motibo cu mayoria di persona no a desaroya of tuma tempo pa pasenshi, ‘e ta algo cu no ta bay lihe manera nos kier’. E ta comparti cu segun registro di Institucion Social di Psicologo, violencia den famia a aumenta.

“Actualmente locual ta pasando ta cu famia no ta custuma di ta tanto tempo cu otro, antes tabata weekend so, pasobra tur hende ta traha of atende scol.”

Nan a tuma nota cu tur esaki a pone cu awo tin mas pleitamento na cas, pasobra ta un obligacion di ta hunto na cas. “E pleitamento a bira mas grandi, tin mas insulto, tin mas kibramento entre otro. Nos ta haya mas violencia, yiunan cu ta kibra, violencia entre hende muhe conta hende homber y vice versa. Violencia verbal y cu frecuencia mas halto.”

Leal ta bisa cu nan no tin desaroyo di e pasenshi y cu nan no lo logra den 2 pa 3 dia locual mester tin tempo pa logra. Segun e ta splica cu mester tin e herment necesario pa cada biaha cu por, hala rosea, ‘cada biaha corda hala rosea’.

Den cualkier situacion cu confronta cune, e ta bisa haci e mesun ehercicio, sea ta cu celular, of cana rond. Leal ta bisa cu tin cu mantene e curpa cu oxigeno pa asina e cel mantene e oxigeno den musculo y relaha.

“Si den caso cu bo yiu a haci sushi of el a comporta un manera cu bo no gusta, esey no ta nifica cu e ta malo y tin cu ta cla pa zundra of dal e mucha. Pero ta bon pa hala rosea profundo y conta te cu shete”, Leal ta conseha.

Di e forma ey ta duna tempo pa e persona ta mas trankil, pa motibo cu si actua di un forma impulsivo lo bay sigui kibra. E ta duna di conoce cu e situacion cu mundo ta pasando actualmente no ta bay caba di biaha. E ta un periodo cu mester cuminsa train di e temponan awo, mirando cu ta pidiendo hende pa keda cas.

Sinembargo toch ainda e situacion cu tin, hende por sali bay supermarket, of botica, persona cu no ta duna atencion mucho ainda. Pero awo tin ‘toque de queda’ anto no sa te ki dia esey lo keda of con e situacion lo evalua y ki otro medida lo wordo tuma.

Leal ta splica cu si hende no ta contesta efectivo cu e ordo aki, y yega cu mester cera paden, ta mas ora pa dia cu famia lo ta hunto, e lo por bira un situacion mas fastioso. Pa e motibo e ta keda enfatisa cu e training di pasenshi mester tin den cas. Sea e pasenshi cu yiu, pareha cu ken cu ta den cas ‘hala rosea, conta te shete y despues contesta’.

A puntra Leal tambe kico pa haci den e parti cu ainda hende cu ta den cas no tin mucho creatividad, of nan ta custuma di ta pafo y awo mester keda paden. Ta den fase cu tin un presion grandi ki conseho e ta duna den parti pa hende por anda cu otro.

E ta contesta cu den famia por haci diferente cos pa entretene nan mes, sea wega di mesa, bira creativo den haci co’i hunga pa asina cada miembro den e famia por hunga hunto, weganan manera domino, lesa algo manera buki. “No tur hende gusta lesa y no mester ta un buki” pero por lesa otro cosnan cu nan por haya mas agradabel.

Tambe ta menciona awendia hende ta haci uso di cable, Netlfix, pa probecha pa keda ocupa pa bo mente. Por haci otro actividad manera haci closet limpi, cuminsa saca for di cas paña of material cu no ta usa.

“Awo cu tin e tempo, por probecha di haci tur e actividad nan aki. Wega di famia, Netflix, comparti pa asina e famia no bira toxico cu otro. Tampoco ta recomendabel pa cera bo mes den un camber pa wak celular henter e dia. E importante ta cu violencia di famia tin cu stop”, el a bisa.

Segun Leal a bisa cu esey ta locual ta mas importante: cu e violencia den famia tin cu stop. E unico cu nan ta pidi ta pa famia keda uni, sinta banda di otro, wak television hunto, haci deporte den nan cas; si algo malo of negativo pasa nan por stop di zeur of zundra.

Esey ta un peticion cu e hunto cu tur profesional den area ta pidi. A ripara cu na Boneiro y Corsou violencia den famia tambe a aumenta. Lo unico cu ta pidi ta pa union y pasenshi ‘pero pa stop e violencia’.

Leal lo ta compartiendo mensahe pa brinda calma na persona cu por tin mester di yudansa riba e pagina di Facebook ‘Robert Leal PHD consultant’, unda lo pone video pa persona por tin informacion y comunicacion cu otro.

Pa hende por cuminsa compronde y tuma tempo. E lo duna tecnica pa calma persona cu mester. Nan lo haci esey tur e dianan siguiente. “Tip pa comunidad pa asina tur hende biba den union pa combati e situacion aki. Keda na cas y ta mas creativo posibel. Nos ta obliga pa hacie y mester cumpli.”