Manera a bira conoci, salud mental na Aruba ta birando un topico masha delicado mes na unda tambe a wordo afirma cu esey lo bira pio den añanan binidero.
Pa cu esaki, Bon Dia Aruba tuma contacto cu e psicologo Antoinette Geerman ken a splica cu desde cu e tabatin mi 22 aña el a bay cerca un psicologo pa via di trauma y rouwverwerking.
El a conta cu awo e mes tin 9 aña trahando como un psicologo y ta haci esey cu hopi amor y pasion, mescos cu su coleganan trahado social, verpleegkundigen, secretarianan, managernan, psikiatranan.
“Nunca mi tabatin berguensa of miedo di bisa cu, ami tambe, manera varios di nos, tabatin mester di ayudo profesional. Pero awo si mi tin miedo. Hopi miedo” Geerman a menciona.
Esaki ta pa motibo cu segun el a sigura, nan ta hayando falta di inversion y e mankracht den sector di ayudo mental, “nos a yega nos “code zwart”,el a menciona.
E peticion pa ayudo mental ta surpasa e cantidad di consulta psicologico disponibel y sistema di seguro medico ta anticua, AZV+ so ta cubri mita di e costo particular, “e presion cu esaki ta causa ta inmenso, y riba un dia manera awe, e ta duel mi asina hopi”, el a papia tocante e caso di e hoben cu a pone fin na su bida ayera pa via di depresion.
Asina mes, e ta haci un peticion pa esunnan den posicion pa escala e capacidad di ayudo mental, pa tur cu tin e forsa pa pidi ayudo, haya esaki tambe NA TEMPO.
