Alysha Boekhoudt ta un hoben di 27 aña di edad cu a gradua cu su Bachelors of Science in Psychology apenas dos aña pasa. Actualmente ta eherciendo su profesion di psicologo aki na Aruba y alabes e ta cabando su Masters of Science in Industrial and Organizational psychology.

Alysha ta conta Bon Dia Aruba cu no semper e tabata sa cu e lo studia psicologia, pero semper e tabata sa cu e tin hopi interes den e comportamento di hende y e motibo pakico nan ta tuma cierto decisionnan y tambe e ta haya placer den yuda hende. “Awor cu mita traha como psicologo mi por bisa cu e sentimento di yuda un hende, sea e ta cu algo grandi of chikito, ta haci mi hopi contento”, el a conta.

Den pasado Alysha tabata tin hopi interes den studia ley tambe y e ta splica cu e interes ey tabata bin for di e parti di dje cu gusta yuda hende. Despues cu tempo el a dicidi cu comprendemento di e motibonan pa kico un persona ta actua di un cierto manera por yuda e yuda e persona miho. E momento ey el a dicidi cu lo studia psicologia.

Diadomingo cu a pasa mundo a celebra ‘World Mental Health Day’. Pa hopi e tema di salud mental na Aruba ta un tabu ainda y no ta wordo discuti abiertamente. Alysha ta bisa cu den tiki tempo e ta wak un mehoracion, no solamente na Aruba pero mundialmente tambe pa locual ta trata salud mental. E ta indica cu ainda por haci hopi mehoracion pa esaki no ta un tabu mas, aunke lamentablemente ainda e ta. “Tiki tiki tin mehoracion si, pero nos tin un caminda pa cana ainda”, el a bisa.

Alysha ta splica diferente manera, cu den su opinion profesional, ta importante pa yuda conscientisa e comunidad di Aruba ariba e tema di salud mental:

“Uno, stop e mentalidad di busca ayudo ta pa hende debil. Esaki ta cuminsa for di ora nos ta chikito. Nos tin e mentalidad cu si nos busca ayudo nos no ta un hende cu por para riba nos mesun pianan, y esaki ta pone cu na grandi hende tin e berguensa di busca ayudo”.

“Dos, stop di siña nos yiunan cu expresa nan emocion ta malo. Ta OK pa yora, ta OK pa rabia, ta OK pa tin miedo. Si for di chikito nos bisa nos yiunan ‘stop di yora, baby so ta yora’ ta pone cu na grandi nan no ta bay expresa nan emocion nan tampoco”.

“Tres, conscientisa pueblo di e diferente problemanan mental cu tin. Laga pueblo sa cu nan por busca ayudo, na clinica priva of na gobierno cu ta gratis”.

“Cuater, hopi cliente mi a ripara nan tin miedo di medicamento. Nan ta pensa cu hende ‘loco’ so mester medicamento, of hende ‘loco’ so mester psicologo. Esey ta completamente incorecto. Tur hende por pasa den temporada nan fastioso cu ta rekeri terapia of medicamento. Esaki no ta hasi bo ‘loco’. Hasta ami, y hopi otro psicologo, ta bay terapia cerca otro psicologo. Esaki ta algo super normal y super necesario”.

Pa finalisa, Alysha ta conseha na cualkier persona cu por ta sufriendo cu nan salud mental pa no warda te ora bo no por mas pa busca ayudo. “Manera bo ripara cu algo no ta bon, busca ayudo di biaha. No tene berguensa pa busca ayudo tampoco. Nos tin hopi psicologo y psikiatra na Aruba cu hopi experiencia cu por duna ayudo. Mescos abo ta bringando cu bo cosnan, otro tambe ta bringando cu di nan. Dus nunca husga otro, hasta si nan bida ta mustra perfecto”.