Siguiendo nos combersacion cu psicologo Dimitri Halley riba e tema di salud mental, el a elabora cu Bon Dia cu e ta un di e prome psicologonan na Aruba cu a trece e mundo paranormal/spiritual hunto cu e mundo psicologico. Akinan el a delinea henter un area nobo unda el a constata cu sin e modelo aki bo no por compronde problemanan mental.
Den entrevistanan anterior cu psicologo Dimitri Halley, el a yega di subraya cu tin necesidad di upgrade e manera di trata cu pashentnan cu salud mental na Aruba. Elaborando riba esaki e biaha aki e ta splica Bon Dia cu e tin di haber cu reconocemento den e aspecto spiritual den e tipo di cuido aki. “Esaki ta locual no tin den e sistema medico actual unda nos ta mira cu un switch ta tuma luga den un hende. E ta bay den locual nos ta yama awendia upside down y tur cos den un hende su mente ta bolter”, e ta splica. Locual ta pasa mentalmente akinan ta cu tur cos cu tabata ariba, ta abao, y akinan e tendencia di kier muri of sali di bo curpa ta bini.
Psicologia di fenomeno paranormal
“Nos si a map e anto visualis’e, anto nos ta mira mundialmente cu e cos aki ta bolter awo. E tin di haber di locual hopi pelicula mes ta papiando di dje di un tipo di zombie apocalypse unda un masa di hende ta cana rond cu un psicologia robes.” Sr. Halley ta bisa cu e hendenan cu e ta traha cu ne den e estado aki, e unico cos cu nan kier ta muri of sali di nan curpa. “Anto esaki nan no ta na altura di dje den e mundo cientifico. Ami a pionero e fusion di e mundo paranormal/spiritual cu e mundo psicologico anto akinan mi a delinea henter un area nobo. Cu sin esey bo no por compronde problemanan mental.”
Nada clasico ta traha mas
Nos a puntra sr. Halley pues ta kico e ta haci cu e pashentnan aki of kico e ta bisa nan cu nan por haci den un tipo di situacion asina. “Riba e nivel aki nada clasico ta traha mas manera e tipo di terapianan cu ta wordo uza awendia. Pasobra e tipo di hendenan aki ta bibando den un area hopi scur anto sin acceso na e funcionnan normal cu mester pa haci terapia psicologico normal of hasta uza otro substancianan”, e psicologo ta splica. E berdad ta cu tin hopi cos den naturalesa manera cannabis cu por wordo uza pa tratamento. Pero segun sr. Halley esaki tambe tin un peliger unda cu por cuminsa depende hopi di dje sin haci otro trabaonan riba bo mes.
Tin tratamento pa psicosis
Pues e modelo di haci un tipo di fusion entre paranormal/spiritual/clinico/medico ta algo cu sr. Halley hunto cu otro coleganan cu ta riba e mesun liña di pensamento ta trahando riba esaki pa basta tempo. E ta un area completamente nobo pasobra mayoria psicologo mes na mundo ta yegando na e nivel aki segun sr. Halley. Awendia ta wordo bisa cu no tin tratamento pa hende cu ta scucha stem of tin cierto nivel di enfermedad psicosis, cual sr. Halley ta bisa tin tratamento pe. Psicosis ta ora bo ta bay den un mundo cu no ta klop mucho mas cu e realidad y pashent no sa kico esaki ta. Psicosis ta intimamente liga cu posesion segun sr. Halley, y tin un parti liga spiritualmente den esaki ora ta trata cu hendenan por ehempel e personanan cu ta riba caya den adiccion cu ta sufri di esaki. “Anto bo no ta yuda e hendenan aki hincando nan den un strait-jacket. E parti aki ta e base y p’esey bo ta wak cu Europa a faya den e terenonan aki”, segun sr. Halley. Cosnan cu Hulanda a pasa den dje cu no ta traha mas, Aruba tin un custumber pa importa segun e psicologo. Mescos nos sistema di enseñansa: Europa a ripara cu e sistema di Hulanda di Mavo/Havo/Vwo no ta traha.
Caribe su conexion cu mundo natural
Sr. Halley tin colega awo cu ta bisando e cu nan ta reconociendo e aspecto spiritual tambe manera nos a menciona den e publicacion anterior. “Mi a haci hasta un joke tambe bisando cu awo bo ta interesa den spiritualidad paso edad ta halto y morto ta yegando. Esaki ta e punto cardinal y sigur pa Aruba cu ta ainda conecta cu e mundo natural.” Den Caribe sikiera ainda nos tin un tiki mas conexion cu spiritualidad segun sr. Halley unda ainda tin uzo di remedi di tera manera antes. AZV ta impagabel pa via di e remedinan psikiatrico y somatico unda nos tin un pueblo adicto na droganan di prescripcion segun sr. Halley. Mientras e ta bisa cu e tera ta produci cosnan mil biaha miho anto a yega ora pa nos cuminsa reconoce esaki mas den comunidad.
