Den un conferencia di prensa di ayera mainta, minister di Asuntonan Economico, Geoffrey Wever a papia tocante desaroyonan di revitalisacion di Oranjestad y e proyectonan cu tambe ta preparando pa San Nicolas.

Pa esaki, na october di aña pasa a cuminsa cu e instalacion di luznan nobo pa asina eleva siguridad den Caya Betico F. Croes, unda DOW a inicia cu e proyecto instalacion di luznan nobo y adicional la cual tabata inclui 50 palo di luz nobo reemplasando esnan existente y cu no tabata funciona debidamente.

Pa e mesun proyecto aki, minister Wever a informa cu a busca 100 luz mas cu na e momentonan aki su instalacion ta tumando luga na diferente parti di Oranjestad y asina e centro di ciudad por ta mas ilumina. Tambe a cuminsa cu e proyecto di reemplasa tur bari di sushi unda a busca 50 na Aruba mes di Plastic Beach Party e cual ta di material recicla pa asina por cumpli cu e compromiso di haci un Aruba mas sostenibel.

Cas Veneranda ta den pleno restauracion unda ya caba 1 aña y mey pasa a haci e compra di e edificio aki y despues di esey a cuminsa un proceso intenso cu Stichting Monumenten Fonds Aruba pa e restauracion. E destaho publico pa esaki a cera siman manera e mandatario a sigura y aworaki ta den proceso pa eligi e contratista cu ta bay haci e parti di construccion cu ta planea pa cuminsa den e prome siman di september.

“Nos ta bay wak un edificio asina importante cu lo wordo restaura y esaki ta bay bira e cas pa Departamento di Asuntonan Economico y tambe lo tin espacio pa un restaurant pa asina tambe duna contenido na e vision di converti Oranjestad den un centro gastronomico.”

Igualmente, minister Wever a informa cu dos aña pasa a inicia e proceso pa certifica Oranjestad como un Capital Culinario e cual ta un concepto internacional loke ta nifica cu mester cumpli cu cierto condicionnan como pais pero ora lo haya stempel di e Capital Culinario, esey ta duna na e area un exposicion hopi mas grandi. “Nos ta kere cu centro di Oranjestad tin tur potencial pa fungi como un Capital Culinario di Caribe.”

Awe tardi, ta bay anuncia e traspaso di ex-edificio di Ministerio Publico pa FCCA e cual ta bay bira un cas pa studiantenan segun minister mes a anuncia. Nan tin dos aña trahando riba e proyecto aki unda awe nochi for di 7or di anochi ta bay presenta di kico e proyecto ta trata.

Proyecto di Fast Ferry ta bay forma parti di Landspakket y a pidi asistencia tecnico
 Den cuadro di desaroyonan economico e ministerio aki tambe a bin informando tocante loke ta trata e introduccion di un Fast Ferry pa Aruba y Corsou. Aunke e proyecto aki tin varios aña den palabracionnan, segun minister Wever pa hopi aña caba un boletin di investigacion a haci pa e posibilidad di un Fast Ferry y ora nan a drenta den gobernacion a presenta e estudionan aki.

Ora nan a mira e estudio aki, a ripara cu no tin un plan di implementacion unda nan mester wak kico ta falta, den esaki a crea un comision special hunto cu tur stakeholder, por ehemplo, lidera pa Departamento di Asuntonan Economico pero tambe di Refineria di Aruba pa via di tereno den refineria, APA, entre otronan cu por duna conseho pa bisa con por pone tur e proceso aki cana y nan a haci nan investigacion.

Na mei 2023, minister Geoffrey Wever conhuntamente cu minister Ruisandro Cijntje a firma un MoU pa colaboracion riba tereno economico entre Aruba y Corsou. Durante e aña, tabata tin diferente ocasion caminda a inicia colaboracion pa logra metanan comun, entre otro riba tereno di Fair Trade y mas.

Recientemente, diferente partido comercial a mustra interes den inicia un conexion di ferry, den un prome instancia entre Aruba y Corsou, y den un siguiente fase cu Boneiro. Debi na e interes renoba, ministerraad di Aruba a acorda na juni 2023 pa instala un Comision di Conexion di Ferry cu su tarea pa duna conseho riba e condicionnan necesario pa un conexion di ferry entre Aruba y Corsou. Basa riba e FOICE-rapport, e comision a constata cu un ferry pa pasahero ta simplifica e condicionnan publico necesario considerablemente compara cu un ferry cu transporta tanto pasahero como carga.

Pa e motibo aki, minister Wever a bay Corsou dos siman pa bishita e minister di Asuntonan Economico Ruisandro Cijntje pa papia cune tocante e parti di dje y si e tambe tin e deseo pa hunto nan pidi Hulanda pa yuda cu e implementacion. Den esakinan a bay di acuerdo pa hinca esaki den Landspakket pa pidi asistencia tecnico.

Tocante ken ta bay ta operador, kico ta e ruta, kico ta e temponan, kico ta e frecuencia y ken ta e financiadonan, e preguntanan aki lo ser respondi ora lo bin cu e destaho publico “pasobra pa un proyecto asina aki, bo mester laga mercado traha, nos tin diferente partidonan cu ta interesa pa haci’e y nos a wordo acerca door di diferente operador. Pero nos ta desea pa haci diferente evaluacion neutral y pa esey bo mester tin manera nan ta bisa ‘terms of reference” cu hendenan por inscribi basa den mesun set di condicionnan pa bo por scoge e miho partido pa haci esaki,” el a sigura.

“San Nicolas tambe ta parti di loke nos ta revitalisa”
 Minister Wever a señala riba e pregunta tocante desaroyo economico pariba di brug, mirando cu recientemente un tienda cu mas di 100 aña a cerca su portanan den centro di San Nicolas y pa esaki e mandatario a sigura cu nan tin basta tempo trahando riba un proyecto pa San Nicolas y “siman pasa e proyecto aki a wordo aproba oficialmente na conseho di minister hunto cu fondonan nobo, specificamente 4.3 miyon florin extra aloca pa ehecucion di e proyecto.”

E proyecto aki cu ta encera e construccion di un Farmers Market y otro atraccion lo ser anuncia den transcurso di otro siman, segun el a sigura.