Durante conferencia di prensa ayera mainta, Minister di Husticia y Asuntonan Social, Rocco Tjon a elabora un poco ariba e proyecto ‘Veilige Barios’. Durante e ronda di pregunta di prensa, el a splica cu e proyecto aki ta den pleno ehecucion.
El a splica cu e proyecto ta traha riba tres diferente aspecto. Un di e aspectonan aki ta e parti infrastructural, sobre todo ora ta papia di iluminacion den bario. El a indica cu manera ta conoci caba den San Nicolas a cuminsa cu aspecto aki y San Nicolas a conoce ya caba 108 punto di luz adicional.
Aworaki ta preparando pa continua cu e siguiente fase, cu segun el a informa probablemente lo bira bario di Mabon pa mehora e aspecto infrastructural.
Minister Tjon a remarca cu e parti cardinal di e proyecto ta pa percura rebiba tur e Centronan di Bario. Pa e motibo ey, el a señala, aña pasa a firma e MoU (Memorandum of Understanding) cu tur e Centronan di Bario y CEDE Aruba.
El a ratifica cu henter e plan di e proyecto ‘Veilige Barios’ ta den pleno ehecucion y ya caba tin 12 persona cu a wordo tuma den servicio pa tur e Centronan di Bario. Esaki ta contribui pa asina na un forma mas uniforma y centralisa aworaki ta tene cuenta cu tur e diferente aspectonan, y na mesun momento tambe por tin mas actividad den e barionan.
El a menciona cu luna pasa e tabatin reunion cu Sr. Tecklenborg, director di CEDE Aruba ariba e proyecto aki y otro luna, si tur cos ta bon el a indica, ta bay lansa e website pa e proyecto ‘Veilige Barios’. El a indica cu e Centronan di Bario mes a scoge pa e nomber ‘Barionan Unico’ y e website lo ta accesible pa henter comunidad por haya informacion exacto riba ki actividad ta wordo duna den cual centro di bario, ki dia y ki ora.
“E actividadnan aki ta amplio y ta basa riba e parti di deporte, cultura y enseñansa; un parti cu nos ta trahando duro riba dje pa haci esaki mas accesible, vooral pa personanan kizas no por paga un bijles, nan por haya esaki gratis na nos Centronan di Bario. Esaki ta un proyecto cu ta den pleno ehecucion y ta wordo coordina door di CEDE Aruba,” el a finalisa.
