Aña pasa Aruba Conservation Foundation (ACF) a anuncia e proyecto ‘Turning the Tide’ den colaboracion cu Wageningen University & Research, ScrubbleBubbles Foundation y Universidad di Aruba. E proyecto aki ta enfoca ariba e restauracion di biodiversidad y e eco sistemanan marino na Aruba cu ta degrada.

Mas di un aña despues e proyecto ta andando ainda y a traves di un publicacion riba nan pagina oficial di Facebook ACF a duna un actualisacion di con e proyecto aki ta bayendo.

E fundacion ta indica cu den e ultimo dianan rangernan marino y stagiairenan ta trahando duro pa monitoreo e condicion di e coralnan cu a ser transplanta riba e rifnan artificial cu ta localisa den Parke Marino Aruba.

Como parti di e proyecto ‘Turning the Tides’, a instala 400 MARRS y 13 MOSES reefs cu ta structuranan di rif artificial pa restaura coral y duna sosten na e biodiversidad marino.

“Nos coralnan ta constantemente bou di presion y restauracion no ta solamente un esfuerso sino un necesidad pa sigura cu nos sistema ecologico vital por prospera,” ACF a enfatisa.

Un representante di Aruba Conservation Foundation a splica cu e proyecto ta den su fase di monitoreo pa e coral- y mangelnan. El a indica cu ainda falta un fase na Spaans Lagoen cu ta bay cuminsa na januari.

El a informa cu e proyecto ta finalisa den fin di februari y den januari ACF lo saca e documentario cu tur informacion tocante e proyecto ‘Turning the Tides’. E proyecto a financia door di RESEMBID y Wageningen University & Research cu un alocacion di 1.3 miyon florin pa asina cambia e direccion di degradacion ambiental y perdida di biodiversidad pa un ambiente marino saludabel y resistente pa Aruba.

Un rapport di WWF Fund for Nature’s Living Planet Report 2022, ta señala cu e perdida di biodiversidad pa region ta mas grandi den Latino America y Caribe compara cu cualkier otro region. Un rebaho di 94% di biodiversidad a wordo mira entre 1970 y 2018.

Otro estudio, TEEB-study (2018), cu a ser haci pa Aruba a conclui cu e degradacion di ambiente marino lo ultimamente no solamente reprimi e sector di pesca valioso pero tambe reduci e cantidad di turista y ultimamente e bienestar general cu 50%. Otro estudionan mas recien a conclui mesun cos (CBA2020, Oduber 2020, Alberts 2021). Cu esey, ta importante pa cambia e direccion di e situacion pa asina tin un ambiente marino mas resiliente unda cu humanidad y naturalesa por existi den harmonia

Den luna di maart aña pasa expertonan cu a presenta e proyecto a splica, pa loke ta trata restauracion di coralnan, cu e proyecto aki lo brinda e oportunidad unico pa explora y despues test pasobra tur e metodonan exitoso di restauracion di coral semper mester ser adapta na e situacion local. No por djis copia y realisa un metodo di otro pais, di un otro luga exactamente pa un otro area. Semper mester haci ahuste pa haciele adecua pa e situacion local.

Mirando e situacion na Aruba, e expertonan a indica cu e metodo di cuminsa cu implementacion activo di coralnan artificial pa duna inicio na desaroyo di coral lo yuda y esey ta hustamente locual lo purba di haci den e proyecto aki pa Aruba.

 

Den e caso di e mangelnan, expertonan a indica cu ta trata di un habitat super importante pa varios motibo, particularmente nan ta sirbi como fuente di cautiverio di pisca. Esaki kiermen cu e ta un luga caminda e piscanan chikito ta haya proteccion y cuminda pa asina nan por crece bira grandi prome cu nan bay back ariba e rif pa e turista por mira nan y tambe pa e piscado por coy pisca nan. Ademas mangelnan tin un rol hopi clave tambe den e proteccion di e costanan.

E problema cu e mangelnan ta enfrenta, specialmente den algun area specifico na Aruba, ta cu den pasado tabatin hopi mal uso di tereno y e erosion a pone hopi sedimento den e lagunnan di tal forma cu e awa ta bay perdi y e mangel no tin luga di biba mas y e piscanan tampoco no tin luga di biba mas.

E accion di e proyecto di e proyecto aki ta enfoca ariba dos cos; uno ta pone trampanan di sedimento (sediment traps) pa secuestra e sedimentonan prome cu nan yega e lagun y e di dos ta pa saca sedimento pa asina e lagun haya espacio pa awa pa e piscanan por biba y pa e palo di mangelnan tambe por biba.