E premiacion aki normalmente ta ser duna tur aña pa Ars Electronica di parti di e Comision Europeo. E European Union Prize for Citizen Science ta honra, presenta y sostene proyectonan den e area di investigacion cu ta trece cambio, expande conocemento y ta demostra procesonan innovativo cu ta actualisa practicanan existente mientras ta adresa avance social, cultural, ambiental, educacional y politico pa medio di empodera e sociedad civil den e desaroyo di futuro.

E premio aki ta inclui iniciativanan cu ta opera dentro di un categoria amplio di actividadnan scientifico y social cu ta activa ciudadanonan y tin e meta di yega na avancenan cientifico y beneficionan social, sostene comunidadnan y yuda crea un sociedad civil cu ta habri y inclusivo.

E competencia ta habri pa iniciativanan cientifico di ciudadanonan den e Union Europeo, tur e paisnan den exterior y teritorionan conecta na e paisnan cu ta miembro di e union aki, pues Aruba, Bonaire, Curaçao, Saba, Sint Eustatius y Sint Maarten tambe por participa.

E aña aki lo marca e prome biaha cu e Union Europeo lo otorga un premio na proyectonan cientifico civil cu ta extraordinario y ta promove colaboracion, sostenibilidad y un futuro di manera husto. Ars Electronica na Linz/Austria a keda comisiona pa organisa e competencia aki, cual lo carga un premio di 100,000 euro.

Metabolic Foundation a keda nomina pa e premio aki cu pa nan proyecto Surfside Science. Metabolic Foundation a anuncia e proyecto Surfside Science anteriormente, cual ta un proyecto cu lo enfoca riba metodonan pa midi e calidad di aire y awa di lama, cambionan den e costa y vegetacion den e fondo di lama.

Christie Mettes durante un conferencia di prensa algun tempo pasa a splica cu e proyecto ta uno cu a ricibi fondo di RESEMBID, cual ta un fondo di e Union Europeo cu ta maneha pa Expertise France, e agencia pa desaroyo Frances cu ta maneha e proyectonan den paisnan den exterior y teritorionan cual ta inclui Aruba y 11 otro isla den Caribe.

E proyecto aki tabatin e duracion di un aña y durante e aña aki Metabolic Foundation a test diferente metodo cu por ser usa pa automatisa coleccion di data na Aruba su costanan, ambos riba tera y den lama, cerca di e costa. Mettes a indica cu e metodonan ta menos costoso cu e metodo tradicional y e fundacion ta purba haci nan hopi mas aplicabel pa asina nan por ser usa pa personanan cu no ta cientificonan. Metabolic Foundation a percura pa sigura un garantia cu e metodonan ta confiabel y a haci esaki pa medio di durante e aña traha conhuntamente cu e ecologo marino Tatiana Becker, ken a compara e resultadonan di e medidanan cu Metabolic Foundation a tuma y a compara esaki cu e resultadonan cu el a ricibi haciendo uso di metodonan usa den ciencia generalmente.

Proximamente lo tuma luga un conferencia di prensa unda e ehecutivonan y directornan di Ars Electronica conhuntamente cu oficialnan di e Union Europeo lo revela cua iniciativanan lo keda otorga e prome premio di e tipo aki.