Siman pasa a tuma lugar e presentacionnan di e resultadonan di e midimento cu e proyecto Surfside Science a realisa, principalmente na Surfside Beach, pa midi diferente aspecto di nos lama, aire y costa.
Surfside Science kier contribui na resiliencia di Aruba su ecosistema marino y di costa contra e impactonan di cambio di clima. Nan metodo a combina e uso di sensornan electronico, imagen satellite, AI y analisis di potret di bao lama y e resultadonan ta wordo compara y valida door di un ecologo marino usando metodonan standard cu ta wordo usa generalmente den ciencia. E data colecta ta bay di biaha riba nan website pa forma un base pa data cu automaticamente y continuamente por colecta, warda, comparti y analisa data. Tur data ta accesibel pa uso publico y por beneficia specialmente e personanan local cu ta activo den area academico, fundacion, studiante y profesional.
E proyecto aki ta uno di sumo importancia pa Aruba, mirando cu te awo Aruba no ta dispone di suficiente data riba e estado di nos lama y costa. Christie Mettes, coordinador di e proyecto a splica cu nan a enfoca riba e colecta di data. El a splica sinembargo cu entre nan boluntarionan tin varios studiante di PhD cu ta involucra den analisis di e data como tambe studiante di Universidad di Aruba, cu a haci stage cu nan. “[E studiantenan di Universidad di Aruba] a indica cu nan ta studiando riba Aruba, pero nan no tin data. Dus cu tin demanda pa esaki.”
Mettes a conta cu ta bay tin un evento na Linz, Austria, unda boluntarionan cu a colabora cu Surfside Science, cu ta studiando na Hulanda, ta bay ta presente ya cu e team a ricibi un mencion honorario di premio di cientifico ciudadano di Union Europeo. “E aña aki, pa di prome biaha, Union Europeo ta entrega un premio na proyectonan sobresaliente di “citizen science” cu ta promove un forma colaborativo, sostenibel y husto pa yuda futuro. Nos a aplica, y nos proyecto a ricibi un mencion honorario!” a splica riba nan website. “Esaki ta un reconocemento di e esfuersonan di tur hende cu ta envolvi den e proyecto aki, hopi pasante, boluntario, colaboradornan y miembronan di comunidad cu a uni nan man, asina nos kier bisa danki!”
Paralel na e evento aki, cual ta bay tuma lugar na september, ta bay tin un evento na Aruba cu e mesun presentacion riba video, entre otro. Esaki ta bay bira e evento final di e proyecto di Surfside Science, ya cu nan mester a pidi un extension pa por inclui e evento aki como parti di e proyecto. E proyecto tabata financia pa Resembid, cual a duna financiamento pa un aña, y pues awo e proyecto a conclui.
Sinembargo, mientras cu Surfside Science tabata nan proyecto piloto, Mettes a conta cu nan ta bay continua cu un otro proyecto, e biaha aki cu sosten di UNESCO. “Surfside Science tabata nos proyecto piloto, pues aworaki nos tin e sensornan, nos tin e data tambe di con valido nan ta, nos tin e database trahando pa un cierto cantidad di e sensornan.” El a bisa cu a move algun di e sensornan pafo di Surfside. “Un di nan nos ta trahando hunto cu Stichting Rancho. Un di nos prome sensornan, nos prome prototype nos a test e na Rancho caba. Nan tin grupo di piscado cu waf, anto historicamente, Surfside cu Rancho tabata un beach, pues tin un conexion fuerte eynan.” Sinembargo, Mettes ta indica cu nan kier continua cu e proyecto pafo di Playa tambe.
Den nos siguiente edicionnan, Bon Dia Aruba lo trece mas informacion tocante e hallazgonan di e proyecto aki.
