– Dos studiante di ultimo aña di IPA a bati na porta di Fundacion pa Hende Muhe den Dificultad pa yuda clientenan di e fundacion cu un proyecto social.
Raideline Bremo y Marisela Fabus ta den nan ultimo aña como studiante na IPA pa bira maestra anto nan begeleider, drs. Emy Maduro a sugeri nan acerca Fundacion pa Hende Muhe den Dificultad.
E fundacion aki ta haci falta di pañanan interior pa su clientenan, pues a bin cu un idea e ora pa lanta un campaña pa asina akinan aporta na e fundacion cu locual cu nan tin mester. Magaly Maduro, coordinadora di Fundacion pa Hende Muhe den Dificultad ta bisa: ”Tabata pa nos un placer enorme momento cu studiantenan di IPA a acerca nos fundacion pa cu e proyecto aki cu ta un proyecto social y cu nan a kies hustamente e fundacion pa yuda nos den e parti aki.” E fundacion tin necesidad di varios cos pero loke tabata remarcabel ta cu tur ora ta haya donacion di diferente articulonan menos paña interior.
”Cuminsamento di aña mi a comenta esey cu drs. Amy Maduro anto esaki el a trece bek pa IPA y puntra e studiantenan haci algo cu nos. E necesidad ta grandi pasobra pa e aña aki nos tabata tin varios dama cu a acudi na e fundacion y mas cu 20 a keda den nos shelter y nan tur tabata tin mester di paña interior,” sra. Magaly Maduro ta splica.
Campaña
Riba dia 25 di November pa 10 di December mundialmente ta wordo celebra e ‘Orange The World’ cu ta un campaña internacional di Nacionnan Uni pa bringa violencia domestico. En conexion cu esaki, den e dos simannan aki e campaña ‘Orange The Underwear’ lo inicia caminda cu lo tin diferente tienda participando den e campaña di ‘Buy One, Donate One’ organisa door di e dos studiantenan. Ora bo bishita e tiendanan aki y bo cumpra paña interior bo ta haya un otro na un prijs special como donacion na e fundacion. E tiendanan entre otro ta Alankar, Super Shopping, GeeKay, La Aruba y Classic Big Bazzar uno y dos cu lo ofrece entre 10 pa 50% di descuento. Lo tin diferente otro caminda unda lo tin cahanan di donacion unda cu bo lo por aporta cu algo si bo no kier of por aporta cu un paña interior. Lo tin ganadonan riba tur diabierna den e dos simannan aki anto pa participa den esaki bo mester Like e pagina di Facebook di Fundacion pa Hende Muhe den Dificultad riba https://www.facebook.com/fhmdd.fundacion. Pa bo participa bo mester saca un potret cu algo oraño bisti, pone esaki riba e pagina di Facebook di e fundacion hunto cu e hashtag #OrangeTheUnderwear.
Otro necesidadnan
E fundacion tin varios otro necesidadnan anto un di esakinan tambe ta den proceso di wordo resolvi cu un bunita iniciativa. E muchanan cu ta bin cu nan mama den e fundacion, hopi biaha ta muchanan cu a pasa den trauma y violencia den e famia. ”Ora cu nan yega eynan, bo ta mira muchanan di dos tres aña cu wowonan masha grandi asina cu eigenlijk tin mester di un ‘knuffel’, un ‘stuffed animal’ cu nan por brasa den anochi anto pensa cu tur cos ta bay bin bon,” sra. Magaly Maduro ta bisa. E fundacion ta haci falta di bukinan pa e muchanan lesa, paña y sapato pa e damanan como tambe articulonan di cas pa ora nan haya nan apartamento of cas di FCCA pa nan no drenta sin nada. Studiante Raideline Bremo tin un caha poni pafo na e scol cu e ta coriendo stage awo, Mon Plasir School, pa e mayornan cu ta dispuesto di haci algun donacion pa entrega esaki na e fundacion tambe
