ORANJESTAD – Maria College Mavo a tene nan ‘Science Fair’. Dayanne Valdink kende ta juffrouw di natuurkunde, scheikunde, n&t y coordinador di e proyecto, a splica tocante e tema di e aña aki.
“Nos a dicidi di haci e tema ‘back to the future’. E tema ta di e aña escolar aki, tur locual cu nos ta haci ta bay rond di e tema, sea modules, onderwerp y mas. E proposito di e feria di ciencia ta cu mester scoge e tema den natuurkunde, y rond di esey e studiante tin cu scoge e tema cu pasado of futuro”, Valdink a splica.
El a continua splica cu e ta habri pa cada grupo di studiante mes scoge e tema cu nan kier. “Tin cu a haci cu PH di e awa di lama, principalmente rond di ki tipo e miho awa cu por ser uza pa mata den futuro. Tambe grupo cu a traha panel solar, combustibel manera benzine, tin mucha cu ta haci electrolyse di awa, unda cu nan ta haya otro tipo di combustibel pa kima auto.”
Segun Valdink, e studiante a traha waterstof, un mucha cu a traha cu lampi manera a traha den pasado. “Nan ta splica con antes tabata uza moringa mes den e tempo cu no tabata tin coriente na Aruba, ki tipo di azeta pa duna luz na un cas. Ami mes ta corda kerosin, pero e studiantenan a bay mas leu cu moringa y mata di aloe, cu por extrae azeta cu por wordo kima pa por tin luz.”
Bon Dia Aruba a puntra Valdink pakico un proyecto asina ta importante pa e studiante por eherce. E ta contesta cu un studiante, manera mester teoria, tambe ta importante pa practica. “E ta mustra cu nan por haci e den practica, e ta importante, pasobra e ta yuda e conocemento y pa haci algo asina ta impresionante pa nan.”
E ta agrega cu ta duna nan motivacion tambe, pa motibo cu no solamente ta traha e proyecto, pero nan por haya un punto bunita pa nan CP of otro test trahando duro p’e. “Nan sa con pa haci investigacion. Nan a bay WEB, of otro compania cu a yuda nan. Esey ta duna nan motivacion.”
