Diabierna ultimo, a tuma luga un biaha mas un reunion tecnico cu tur stakeholders pa cu preparacion pa ehecucion di e prome fase di e proyecto di Revitalisacion centro di ciudad San Nicolas.

Pa mas cu 1 aña caba trabaonan ta tumando luga pa yega na un plan arkitectonico final cu por ehecuta den 2024-2025, segun un comunicado di gobierno. Durante e periodo aki a sinta cu diferente stakeholders di sector priva, publico y awo a toca turno na e grupo di stakeholders ariba e tereno tecnico pa studia posibilidadnan y presenta un strategia pa por ehecuta e vision presenta. E stakeholdernan tecnico encarga cu esaki ta consisti di decision makers di Utilities N.V., WEB, Elmar, RDA, representantenan di DIP, DOW, Directie Scheepvaart y Havenmeester cu lo presenta nan conseho na gobierno e aña aki con miho por ehecuta e prome fase di e plan di Revitalisacion San Nicolas den 2024.

Minister di Asunto Economico, Geoffrey Wever a bisa den e comunicado cu e ta convenci cu haciendo e stapnan aki di awo ta nifica cu desaroyo di centro di San Nicolas lo trece desaroyo positivo a largo plaso, pa e area, su habitantenan y tur esnan cu ta frecuenta San Nicolas. Pa hopi aña nos ta wak con poco poco empresarionan hoben di pariba ta creando un industria totalmente nobo, cu un enfoke ariba e industria creativo y esaki ta dunando su frutonan.

“Mi ta convenci cu si gobierno di Aruba sostene desaroyonan existente caba door di haci inversionnan cu ta alinea cu sector priva, ta haci cu e ‘return on investment’ lo ta aun mas grandi”, segun e mandatario indicando cu “e ‘spin-off effect’ ta casi garantisa.”

Minister Wever su deseo ta pa incorpora un parti di e tereno cu antes tabata di e refineria den e proyecto pa revitalisa San Nicolas, cu anhelo pa conecta e centro di ciudad di San Nicolas cu lama. Esaki lo trece desaroyonan nobo y expande e posibilidad comercial pa e area. E investigacionnan tecnico lo determina con por haci e desaroyo aki posibel den futuro cercano. Mientrastanto, ta trahando ariba con miho por ehecuta e prome fase di e proyecto aki den 2024, teniendo cuenta cu futuro desaroyonan di area.