Minister di Finansa y Economia, Xiomara Maduro a cuminsa prepara tereno pa atende cu e reforma financiero hunto cu presupuesto 2020 cu ta na caminda pa wordo trata den parlamento.

E mandatario a abstene di bay den detaye riba e temanan di reforma fiscal y presupuesto 2020. Pero si el a trece informacion prome cu nan ta cuminsa debati e dos asuntonan aki den nos organo legislativo, pa asina hiba un debate mas sano pa kico Aruba mester di mas fondo. Pero tambe con e fondo aki ta wordo hinca den otro. Maduro a laga sa cu nan kier haci’e den un forma cu pueblo di Aruba lo por carga cu e situacion aki.

Gasto di personal y pago di interes.
Maduro a haci un presentacion exhibiendo un serie di grafico pa ilustra entre otro, riba gasto di personal y pago di interes cu ta e dos gastonan mas grandi den gobernacion.

Den un grafico cu sigur e lo exhibi tambe durante tratamento di presupuesto 2020, ta ilustra kico tur a wordo haci pa stabilisa e gastonan aki. El a mustra e liña cora cu ta delinea e blafon of maximo di e gastonan cu nan a concorda pa gasto di personal den e protocol firma cu Hulanda. Den e grafico ta wordo mustra cu nan a keda bou di esaki. E ta haya cu gobierno a cumpli cu e palabracion di e gastonan maximo di personal den cuadro di e protocol cu Hulanda.

Sinembargo den e mesun grafico tin un linea gel -cu na interpretacion di e mandatario- tin di haci cu e gasto di overtime hinca den e componente di personal cu ta mustra cu ta subi keto bay. “Overtime na Aruba a causa cu sigur e gasto di personal ta subi,” el a bisa.

Un di e causanan relaciona cu e concepto aki tin di haci cu e control di nos frontera debi na e situacion den e pais bisiña di Venezuela cu ta un componente cu ta pone presion riba e gasto di personal. El a sigura cu gobierno a y ta trahando pa baha gasto di personal.

Proyectonan PPP.
Tur e proyectonan PPP (Private Public Partnership)cu Aruba tin su cifranan a wordo hinca den un grafico. Esunnan mas notabel tabata hospital, Green Corredor y Watty Vos Boulevard. Asina e mandatario kier presenta loke el a yama “un bista di e lama di gasto” pa pais Aruba cumpli cune te aña 2044.

Solamente e tres proyectonan menciona ariba ta bira un peso grandi riba e componente di PPP. Pa 2020, segun e mandatario, nos ta bay paga casi 80 miyon pa e proyectonan PPP. El a selecta e proyecto di MFA, Hospital, Green Corridor y Watty Vos Boulevard, caminda pa nan ya caba mester paga 70 miyon. Pero di e 70 miyon di e proyectonan PPP, 50 miyon ta relata na loke ta subida di interes di e debe cu nos tin como pais Aruba, el a bisa.

 

El a splica cu ora e situacion di credibilidad financiero deteriora, esaki kiermen cu e peso di e debe di e proyectonan aki ta bira mas acelera; of e ta bira mas prioritario. P’esey el a dicidi di duna un splicacion unda e gastonan ‘extra’ ta hinca wordo hinca den otro.

Minister Maduro a bisa cu den e presupuesto tin 105 miyon extra na gasto. Pero ya caba tin 30 miyon caba extra cu a bin acerca pa por cumpli cu PPP (18 miyon), AZV (12 miyon) cu ta keda un riesgo. Nan ta purba di haci e debe aki pagabel, pero di otro banda gobierno ta creando espacio financiero pa bin cu cierto inversion den nos comunidad, segun e mandatario.