Ayera 16 di october tabata e Dia di Alimentacion bao e tema di e aña aki “Awa ta cuminda, awa ta bida” minister di Sector Primario Ursell Arends hunto cu Fundacion Santa Rosa y WEB Aruba N.V a celebra e dia cu varios desaroyo pa e sector aki.

Minister Arends a señala cu Ministerio di Naturalesa ya caba ta trahando riba diferente desaroyonan y ayera nan a para keto cu e lansamento di un proyecto piloto pa scolnan basico pa asina nan por cuminsa registra y haya e oportunidad di tin un plantacion y un Agro Forestry na nan mesun scol.

E iniciativa aki tin como meta pa educa e siguiente generacion riba e balornan di agricultura sostenibel y mas cu tur cos, promove interes di sector primario unda e muchanan ta haya oportunidad educativo pa siña tocante agricultura sostenibel usando tecnicanan di Agro Forestry pa mehora e calidad di suela y mas cu tur cos, elimina e uso di pesticida.

Ademas di esey, e proyecto ta aporta na siguridad di alimentacion y autosuficiencia cu un enfoke riba scolnan cu kisas por tin limitacion pa por yega na e tipo di proyectonan aki kisas pa limitacion financiero.

Pa esaki, scolnan por cuminsa registra for di 1 di november te cu 15 di november, directiva di scol lo haya carta cu tur splicacion pa asina aki nan por haya tur detaye relaciona cu e proyecto aki, minister Arends a informa cu 10 scol ta bay ser scogi pa participa den e proyecto a base di algun criterionan specifico, manera motivacion di scol, tereno disponibel cu awa y coriente y tambe e compromiso di scolnan pa participa den e proyecto cu ta cuminsa na januari 2024.

“Ministerio di Naturalesa ta trahando conhuntamente cu Santa Rosa y tambe cu Living Soil Aruba pa asina ey duna guia na scolnan con nos por yega na sostene y tambe brinda e materialnan necesario pa e planificacion, plantacion di e matanan y tambe con pa anda cu e tereno mes tambe, ademas personal di scol y tambe boluntarionan lo ricibi training tocante tecnicanan di Agro Forestry, mantencion y cuido di plantacion di mata y tambe e integracion di esaki den e curiculo escolar, tur e partners cu ta participa por garantisa un ehecucion exitoso di e proyecto aki,” minister Arends a sigura.

Rose Barros di Living Soil Aruba a expresa cu e proyecto aki ya caba a cuminsa na Prinses Amalia Bassischool y door di esey a haya inspiracion pa haci pa Agroforestry na otro scolnan unda muchanan 1 studiante di cada klas ta traha den cunucu, cortando yerba moombasa, ta cosecha papaya, yuca y berehein.

Tur scol basico por participa te awor y manera minister Arends a expresa nan lo sigui amplia, awor e ta un proyecto piloto y e ta rekeri boluntarionan loke ta nifica cu mayornan tambe mester participa pa asina conhuntamente por mantene e plantacion den scolnan.

Tin algun scolnan cu tin e proyecto cu Santa Rosa a implementa y segun minister Arends a expresa, esey ta un otro manera di plantacion cu tin e titulo “Ban planta awa” loke ta crea iniciativa y interes pa cuminsa planta diferente.

Memorandum of Understanding pa ofrece na cunukeronan un tarifa di awa mas economico
 Ayera mainta, tambe minister Arends a firma un (MoU) cu director di WEB Aruba N.V, Alfredo Koolman mirando cu un di e retonan di mas grandi pa cunukeronan ta enfrenta ta e tarifa di awa, segun minister mes a splica.

“Nos ta consciente cu e cosnan di awa por limitacion pa loke e ta trata e impacto cu e tin riba e cosecha pero tambe riba e conexion profundo cu nos cunukeronan tin cu nos tera, di e forma aki ta transforma su mes tambe den e ambicion cu e agricultornan y cunukeronan local tambe tin,” el a bisa.

Nan a traha riba un acuerdo hunto cu WEB y Santa Rosa pa por a yega na un extension di un MoU pa ofrece na cunukeronan un tarifa di awa mas economico, “nos agricultura por y nos ta convenci cu lo por sigui desaroya na un forma cu nos por yega tambe na garantisa e siguridad di alimentacion cu nos kier mira crece riba Aruba,” minister Arends a sigura.

E acuerdo aki ta pa un periodo di dos aña y e meta ta pa forma colaboracion duradero entre Santa Rosa y tambe WEB Aruba N.V, e cunukeronan por registra pa por haya e tarifa special di nivel C y pa otorga esey mester cumpli cu algun rekisito, un di nan ta cu e cunukero mester ta registra na Camara di Comercio. Pa loke ta trata e pensionadonan, nan a logra di flexibilisa e rekisitonan pa keda mas atractivo, segun minister Arends a bisa.

Alfredo Koolman a expresa cu for di 2020 nan a bin cu un colaboracion cu Gobierno di Aruba y Santa Rosa pa ofrece un solucion pa e cunukeronan na unda ta evidente cu na Aruba ta carece di suficiente awa pa haci agricultura, cria y hoficultura.

“Transporte di awa ta un challenge na unda e creatividad di WEB a bin pa suministra e awa akinan pa agricultornan semper y cuando ta cumpli cu rekisitonan y tambe nan ta hay’e via tuberia of a base di e procedura cu nos ta aplica cu un tarifa special, periodicamente nos ta haya informacion di Santa Rosa di e forma cu nos ta wak e efectividad y e programa aki.” el a finalisa.