Grupo di studiante di Universidad di Aruba a bay den Caya Grandi pa asina clausura nan proyecto ‘Human Rights, Values & Ethics’ unda cu studiante a crea un mensahe di conscientisacion y pa celebra dia di derecho humano.
Docente di universidad di Aruba Nicole Hart kende ta duna les ‘specialmente pa opleiding social work y development’ a bisa cu un di materia ‘human rights values & ethics’. Cada studiante mester a bay den Caya Grandi pa clausura nan projecto y pone atencion riba diferente grupo den sociedad cu no ta haya e atencion necesario.
Hart ta splica cu asina e studiantenan a protesta of crea diferente actividad pa e pueblo den Caya Grandi. Tur aña nan ta haci proyecto similar, pero ta keda semper den campus di universidad. “Mirando e aña aki cu e grupo ta mas grandi, nos kier a duna chens pa nan bay den caya y papia cu hende cu no sa di aspecto social of derecho humano en general.”
Hart ta expresa cu ta contento cu Caya Grandi tabata yena cu turista y hende local, cu studiante por a papia cu diferente hende riba nan topico. Segun Hart, e tabata un reto pa algun studiante manera esnan di Colegio cu pa prome biaha mester a haci actuacion, cosnan diferente pa nan ‘e ta refleha esencial den nan crecemento manera profesional’.
“Pa nos sali for di nos zona di comfort, pa protesta y crea conscientisacion pafo di universidad, tabata experiencia pa mi como docente pa durf. E tabata emocional con el a bay y great cu tur a participa. Ta orguyoso di cada studiante cu a pone energia y esfuerso den campaña”, el a bisa.
