Glen Geerman, fotografo local, a bin cu iniciativa pa busca un localidad den area di lama, pa asina busca plastic y sushedad cu nan por huza pa transforma den obra artistico.
Plastic awendia ta dañando medio ambiente y habitat. Geerman a bisa cu el a wak potret di tortuga cu plastic rond di nan cabes. E isla di plastic cu tin riba awa ta ‘cosnan cu a capta mi atencion’.
Pa e motibo ey, el a dicidi di forma e proyecto aki. “E plan ta cu prome nos ta bay piki sushi rond di un beach di Aruba, principalmente plastic, anto for di eynan tur locual nos piki nos ta bay uza”, Geerman ta splica.
For di e plastic of material cu nan colecta, nan ta bay traha cune te yega na crea algo. El a bisa cu iniciativa aki tambe ta pa haci cosnan positivo den comunidad. Hende por piki sushi y ta creativo cu esey.
“E diferencia ta cu nos ta bay usa locual ta haci daño. Pasobra si nos bay cumpra plastic, e ta bira laaf y no ta duna e mensahe, anto na final ta bay wordo benta afo. Pero si nos piki y crea algo, ta mas netjes y positivo”, el a expresa.
Ora di caba di piki e sushi y tin e mateial, ta escohe un dia pa haci e photoshoot y video. Lo tin dos modelo cu a bay di acuerdo cu e idea, cual ta pa nan ta ‘semi naked’ pa asina mustra libertad y naturalesa.
Dos fotografo lo haci uso di nan talento, cu nan mesun idea apart, pa por tin diferente estilo pa captura e proceso di e video y e potretnan. Un modelo lo para un caminda unda mas plastic lo aparece y lo tapa e persona. “Un forma di bisa cu plastic ta hoga e persona.”
E idea ta mas o menos proyecto cu ya caba a wordo haci pa consientisa rond di mundo. “Tur persona cu kier participa ta bon bini den e parti di piki sushi pa asina yuda den e proyecto. “Plastic ta malo y ta un manera positivo pa contribui na naturelsa y medio ambiente.”
