Bon Dia Aruba a entrevista Jesula Valdez, kende a cuminsa un proyecto pa traha tur tipo di peluca, extension, y micro extension pa tur estilo di cabey. Su intencion ta pa genera placa pa den futuro por ofrece na pashentnan cu a sufri di malesa cu a pone nan perde cabey.

Sissy Juxy Hair ta e nomber di e compania cu Valdez a lanta. Tur diadomingo e ta ofrece un transmision en bibo, caminda hende por acerca y haya sa tocante estilo di cabey. Tambe nan ta splica con un persona por instala nan peluca y pa corda semper acerca un profesional.

E ta bisa cu pa motibo di descuido, pa no trata e cabey di un manera sigur, por ocasiona cu e persona por perde su mesun cabey. “Tin material pa traha cune den pone peluca of extension of laser, cu por ta un tiki peligroso.”

Den su plannan mas adelante, e ta conta cu e tin pensa pa duna les, mirando cu ora e mes tabatin necesidad di bisti peluca of pone extension, no tabatin. E idea ta pa siña hende cu ta bisti peluca y no tin tempo pa pone esaki.

Tampoco el a ripara cu tabatin hende profesional pa atende cu nan. “Nunca mi a wak hende cu por traha cu peluca y si tin algun cu por, nan ta pone un prijs demasiado halto. Mi ta compronde cu ta caro, pero no mester exagera. Anto esey ta abuso, mester tin comprension cu no tur hende por paga y no haci di mas. Lag’e na un prijs agradabel.”

Su intencion ta pa den un futuro por yuda pashent di sea cancer, cu ta un malesa cu ta wordo atendi, pa bende peluca. “Como hende muhe no ta sinti feliz ora nan perde nan cabey. Te ainda nan por duna un bon prijs pa bende peluca, te ora yega na suficiente cu nos por haci donacion.”

Nan ta bisa cu cualkier persona cu por acerca cu malesa, nan por haya un descuento, ‘prijs special’ y ta haci instalacion pa nan tambe. E ta remarca cu tur cabey cu nan ta uza ta cabey di berdad y no sintetico.

Bon Dia Aruba a puntra con e prijs ta varia. E ta splica ta depende di kico e persona mes kier, sea den largura of estilo di cabey. Tambe nan ta ofrece e otro material cu mester pa haci instalacion cu no ta haya na Aruba, manera e lijm of clip, of cualkier tratamento cu ta uza pa mantene e cabey.

Un extension di cabey manera keratin, cu ta pida pa pida, por dura den e cabey di 6 pa 8 luna. Tin tambe keratin micro, cu por dura 8 luna. Tambe ta depende con e persona ta mantene su cabey y si ta sigui conseho cu profesional ta duna.

Pa locual ta trata peluca, e ta bisa cliente pa no uza un pa mas largo cu 2 siman. Esaki ta pa motibo cu e lijm por irita e cuero di cabey. Ta bon cu despues di dos siman ta laba e cabey y pone e peluca bek. E cuero mester aire y si ta keda tap’e por trece infeccion. Esey no ta recomendabel.

Cualkier persona cu kier acerca, lo ricibi recomendacion tocante estilo di cabey dependiendo di nan cara of si e persona mes a dicidi con e kier. E por traha full lazer, ta traha diferente cu man. “Nos por traha peluca pa bo. Tur producto ta bin di afo.”

Te ainda nan producto ta cumpr’e via online y despues e persona por acerca pa busca su producto, y aki nan ta haya ayudo pa instala, of bisti, e cabey. Te ainda nan ta bende via hende cu nan conoce, pero kier pa yega leu asina nan por aporta bek na e comunidad, haciendo donacion di peluca pa persona cu cualkier enfermedad.

Por haya mas informacion riba nan Facebook of via 564-9513. Tambe por manda un mensahe priva via Facebook.