E medidanan implementa pa por combati e pandemia di COVID-19 a trece como consecuencia cu hobennan na Aruba a sinti nan mes bao hopi presion. Hopi ta e hobennan cu a sinti insiguridad, stress, miedo y ferfelo cual por influencia nan salud mental den forma negativo.
Cu e desaroyo positivo di hoben den mente, Heart-Centered Leadership Foundation (HCLF) ta anuncia su proyecto nobo pa hobennan riba e tema di salud mental: Curason pa Curason. E proyecto Curason pa Curason tin como meta pa promove e resiliencia mental entre hobennan door di normalisa combersacion tocante salud mental y motiva hobennan pa nan mes contribui na kibra taboe rond di e tema na Aruba.
E proyecto ta consisti di actividadnan unda hobennan (14-17 aña) lo bay den combersacion cu otro tocante salud mental. Esaki lo tuma luga mediante dos actividad. E prome actividad ta Impact Café, unda den un ambiente sigur hobennan por papia tocante topiconan manera felicidad, emocion, soledad y miedo. Durante Impact Café hobennan ta wordo empodera pa bin cu solucionnan pa mehora con ta trata cu e tema di salud mental. E solucionnan cu hobennan propone lo por wordo trata den un siguiente actividad, Impact Factory, unda nan lo ricibi herment pa por transforma nan solucionnan den un actividad of proyecto pa haci un impacto den nan comunidad. Curason pa Curason lo wordo implementa na 3 school secundario na San Nicolas cu e meta di por yega 300 alumno cu e proyecto. Ademas di alumnonan, maestronan lo ricibi sesion di informacion con pa apoya nan alumnonan riba tereno di salud mental y un tayer ‘Heart-Centered Professional Leadership’ cu ta dirigi su mes riba con pa sostene alumnonan den implementacion di proyectonan y actividad. E resultadonan y recomendacionnan cu acumula durante e proyecto ta wordo documenta den un rapport y comparti cu partners y gobierno.
HCLF ta kere den sosten cu hobennan por duna otro y pa es motibo e actividadnan pa hoben den e proyecto aki ta wordo guia door di ‘Heart-Centered Impact Coaches’. ‘Heart-Centered Impact Coaches’ ta hobennan adulto entre 18-29 aña cu HCLF ta train y prepara pa por ta un role model positivo pa e hobennan y guia hobennan durante diferente actividad. Pa por sostene e proyecto HCLF actualmente ta recluta hobennan adulto cu ta interesa di bira un Heart-Centered Impact Coach. Por registra pa bira un Heart-Centered Impact Coach te cu dia 31 di augustus via nos website www.hclfaruba.org of via e facebook page di Heart-Centered Leadership Foundation.
Heart-Centered Leadership Foundation a wordo funda na aña 2008 cu e mision pa inspira y empodera nos hobennan, fortaleciendo asina nan ser interno y externo pa nan por participa den un mundo moderno y duna bek na nos comunidad. Desde 2012 ta traha activamente riba programanan cu ta ofrece hobennan hermentnan pa nan por descubri nan potencial y yuda nan refleha riba 3 pregunta: ken mi ta?, kico lo mi kier logra?, y kico ta mi habilidadnan? E proyecto Curason pa Curason ta posibel danki na sosten financiero di Fonds 21. Fonds 21 ta haci iniciativanan empresario, cultural y social posibel. E fondo ta sostene proyectonan grandi y chikito riba tereno di Arte & Cultura y Hoben y Sociedad. Asina Fonds 21 ta ofrece solicitantenan e oportunidad pa logra nan ambicionnan. Por lesa mas tocante Fonds 21 door di bishita nan website www.fonds21.nl
