Siman pasa a tuma lugar e presentacionnan di e resultadonan di e midimento cu e proyecto Surfside Science a realisa, principalmente na Surfside Beach, pa midi diferente aspecto di nos lama, aire y costa.
Un di e areanan cu e proyecto a enfoca riba dje ta midi e calidad di aire. Segun nan website, e monitor di calidad di aire ta un di e prome proyectonan di monitoreo ambiental cu cual nan a cuminsa e proyecto, midiendo materia particula, humedad y temperatura.
Pa construi esaki, nan a acerca Sean Brokke, kende ta un studiante na Fontys den tecnologia ICT, pa bin Aruba den berano di 2022 pa traha intensivamente riba e monitor di calidad di aire pa construi un prototipo. E tambe ta bin trahando den e area aki na su universidad, y tabata exitoso den crea nan prome sensor di calidad di aire yama ‘the First Airbender (FAB).’
Segun Surfside Science ta splica, un di e metanan principal ta pa otro islanan por tin acceso na e instrumentonan pa nan por replica nan sensor di calidad di aire y asina por colecta nan propio data di calidad di aire. Tur detaye di e sistema ta accesible a traves di nan website, https://science.brenchies.com/en/air-quality-2/ – esaki ta inclui e code, schematica, y modelonan CNC pa traha e circuit board.
Na augustus 2022 net prome cu bolbe pa su estudio na Hulanda, Sean y su stagiaire Ian tabata cla pa instala e First Airbender. Esaki a keda instala na Nephtali Park, cual ta situa banda di e costa Surfside riba un palmita, cual nan a yama Dimitree. For di e dia aki, FAB tabata trahando cu tiki disturbio, colectando data cu por haya riba nan portal di data riba nan website.
Na november, Stephen Richards, un studiante di Academic Foundation Year na Universidad di Aruba a haci un stage cu e team, unda a test e replicabilidad di e First Airbender. El a traha hunto cu Jeff Romero pa construi e Second Airbender (SAB). Esaki tabata e prome biaha cu Stephen a traha cu e elementonan necesario pa traha e monitor: e mester a diseña, 3D print, conecta un breadboard, soldeer, crea schematica, codifica den Arduino y troubleshoot na caminda. Cu e experiencia limita cu e tabatin na comienso, Stephen a logra produci e Second y Third Airbenders (SAB y TAB) y a duna nan tur confiansa den e replicabilidad di nan monitor di calidad di aire.
SAB, e Second Airbender, inicialmente a keda instala riba un boto di vela na Surfside, cerca di FAB, pero algun problema a surgi unda cu mester a trece e sensor back pa reparacion. TAB tabata instala den nan cura pa test prome cu su instalacion na Surfside.
Pa validacion, Tatiana Becker, ingeniero ambiental, a test FAB, SAB y MAB (Mobile Airbender) cu un meter di referencia cu nan a fia for di ACE Engineering Firm, pero desafortunadamente, dificultadnan tecnico a preveni un resultado cla.
Mas informacion riba e data cu a colecta tocante calidad di aire ta disponible riba website di Surfside Science.
