Ayera tardi National Central Bureau for Counterterrorism, Security and INTERPOL (NCTVI) a introduci oficialmente e proyecto InterPol aan de Grens, un proyecto pa mehora seguridad na e fronteranan di Aruba. Minister di Husticia y Asuntonan Social, Sr. Rocco Tjon hunto cu director di NCTVI, Sr. Adolfo Richardson a duna un splicacion di con e proyecto aki ta hinca den otro.

NCTVI a wordo funda na 2018 debi na e aumento di preocupacion y menasanan mundial den e area di delitonan cibernetico, terorismo y delitonan transnacional emergente. Tjon a expresa su satisfaccion cu e proyecto aki, unda dos punto di maneho di su ministerio ta bin hunto, cual ta eleva seguridad di e fronteranan y na mesun momento, a traves di inteligencia, comparti informacion.

El a splica cu InterPol aan de Grens ta un di proyectonan caminda practicamente e sistema conoci como Radex ta wordo acopla na tur e basenan di data di Interpol. Esaki ta nifica cu ora personanan bin Aruba, cu ta señala pa Interpol, Aruba lo haya e hit y asina por preveni cu e personanan aki ta drenta Aruba pa haci cualkier maldad cu nan a bin Aruba pa haci.

Esaki no ta solamente un sistema, pero den practica tambe. Tjon a informa cu tin un oficina na aeropuerto di Aruba den cual tin personal di Interpol, pa di e forma aki no solamente percura cu e sistema aki ta funciona bon, pero ta percura tambe pa e colaboracion entre e diferente departamentonan cu tin responsabilidad pa loke ta garantisa seguridad na e frontera, por wordo ehecuta na un miho forma.

Tjon a indica cu e proyecto InterPol aan de Grens ta un di proyectonan cu NCTVI y Ministerio di Husticia lo lansa pa eleva e seguridad di ciudadanonan di Aruba. “Obviamente nos ta bay traha a traves di un maneho nacional pa locual ta informacion y inteligencia. Esaki ta un di e proyectonan cu ta fit den e maneho aki”, el a bisa.

“Otro proyectonan manera iArms, tambe ta un proyecto cu NCTVI lo bay lansa, ta specificamente pa e seguridad pa loke ta trata armanan cu ta circula ariba nos isla. Manera nos sa, armanan primordialmente ta wordo importa, nan ta drenta Aruba via e canalnan ilegal. A traves di e sistema aki, iArms, bo por percura cu tur e comparticion di informacion entre tur e departamentonan hudicial ta miho; y e bon di esaki ta cu e ora lo bo haya un miho bista ariba e networknan, y di e forma nos lo por bay combati criminalidad mucho miho”, Tjon a agrega.

Den un conferencia di prensa siman pasa, Tjon a anuncia cu den fin di november, lo lansa tambe e proyecto piloto pa loke ta e mobile apps pa cuerpo policial. Esaki tambe ta fit den e cuadro ey. Na comienso di 2022 lo introduci tambe na Aruba e proyecto piloto di mobile data terrminals pa asina informacion y inteligencia ta mas accesibel pa tur cu traha di berdad pa eleva seguridad na Aruba.

“E no ta solamente un sistema tecnologico, pero esnan cu ta traha ariba caya, e polisnan, esnan cu ta traha den inmigracion, duana, NCTVI, etcetera lo bay wak e fruto di e proyectonan aki. Y sin lubida obviamente nos coleganan na Guarda Nos Costa, cu a base di tur e informacion aki no solamente por percura pa Aruba ta mas sigur, pero e lo ta pa nan propio seguridad”, el a enfatisa.

Director di NCTVI, Adolfo Richardson, a elabora ariba e sistema di e proyecto InterPol aan de Grens. Combatimento di criminalidad ta cuminsa na nos fronteranan y cu e proyecto aki, ya caba NCTVI a duna inicio na esaki. El a indica cu NCTVI ta hopi contento cu minister a asumi su cargo y inmediatamente a duna e luz berde pa NCTVI implementa e proyecto aki. Y desde 1 di november Aruba ta pertenece na e paisnan na mundo cu tin acceso, pa medio di Interpol, na databasenan grandi. “Asina e autoridadnan di nos frontera por screen pasaheronan na momentonan cu nan ta drentando of saliendo for di Aruba”, el a bisa.

Segun Sr. Richardson a informa, dialuna 1 di november pa 10or di mainta e sistema di e proyecto a bay live y pa algo pasa di 1or di atardi nan a haya e prome hit. Tabata trata aki di un persona cu kier a drenta Aruba cu un documento horta.

“Esey ta demostra cu nos sistema ta trahando y eerlijk bisa mi no a spera cu el lo a bin asina lihe, pero nos a haya nos prome hit cu nos mester a bay atende na aeropuerto cu e situacion. Esey ta demostra cu e sistema ta eficiente y efectivo”, el a agrega.

Sr. Richardson a sigui splica cu den e añanan cu ta bin tur e departamentonan hudicial lo enfoca ariba e informacion, “pasobra informacion ta e clave pa combati criminalidad”. Na e momentonan aki NCTVI ta explorando e diferente posibilidad cu tin pa zorg cu e basenan di informacion cu tin por ser utilisa pa combati crimen.

El a enfatisa e colaboracionnan e gran importancia di colaboracion entre NCTVI y tur nan partnernan internacional, pasobra dia pa dia criminalidad ta crusando e fronteranan di Aruba y e colaboracion cu e partnersnan internacional y e acceso pa informacionnan internacional ta bira mas necesario cada dia.

“Asina nos ta demostra cu nos intencion pa combati criminalidad ta un compromiso serio y conhuntamente cu tur nos partnernan, mi ta kere nos lo logra pa haci Aruba un luga mas sigur pa biba”, el a agrega.

E tema di seguridad di e fronteranan di Aruba den su totalidad ta keda un preocupacion. Tjon a elabora ariba e tema di con ta bay garantisa seguridad den e fronteranan den su totalidad. El a splica cu e proyecto InterPol aan de Grens ta un parti di e plan pa aumenta seguridad na e frontera.

“Si bo wak e landspakket, e palabracionnan cu tin haci specificamente pa loke ta trata e plan pa aumenta seguridad na nos frontera, e ta consisti di diferente nivel. Obviamente bo mester tin personal y ekipo pa bo por tin e patruyanan na e costa. Y na ultimo tambe bo no por laga afo e seguridad pa loke ta nos frontera, pasobra caminda mas hopi persona ta drenta Aruba, keto bay ta nos aeropuerto. Dus p’esey ta hopi importante cu nos tin un sistema aworaki pa por garantisa e seguridad eynan”, el a indica.

El a splica cu e sistema aki ta asina importante tambe pasobra cu Aruba ta depende hopi di turismo y e turistanan gran parti ta bin for di Merca. Y mirando e relacion entre Aruba cu Merca, ta importante pa nan wak cu como pais Aruba ta inverti pa na final di dia garantisa e seguridad di e turistanan cu ta bishita nos isla tambe.

El a sigui splica cu mester keda inverti pa keda mehora seguridad, pasobra e seguridad di e fronteranan no ta depende solamente di e un sistema di radar, e ta depende di personal y di cooperacion di e departamentonan. Y ariba esey, Minister ta indica, nan ta poniendo prioridad aworaki. Structuralmente for di e ministerio nan ta reuni cu e partnernan pa asina percura cu e cooperacion ta mehora.

“Nos sa cu tin espacio pa mehoracion y nos ta trahando ariba esaki door di inverti no solamente den e aspecto tecnologico pero tambe den e parti di procesonan di trabao y e parti di cooperacion entre e diferente instancianan”, el a señala.