Minister di Turismo, Dangui Oduber ta consciente cu nos mester desaroya un industria turistico sostenibel. E ta kere cu como pais, nos enfasis mester ta riba un maneho duradero y sostenibel, asina el a declara na Bon Dia Aruba.

Tocante e proyecto di hotel grandi cu lo bin den area di Sero Colorado, e mandatario no ta descarta cu e por resulta un impacto grandi pa nos isla. Durante e conferencia reciente di ATCA (Annual Tourism Conference Aruba) a haci enfasis riba un turismo sostenibel, teniendo cuenta cu nos capacidad di carga. E mandatario a bisa cu e ta consciente di esaki. Oficina di Turismo (ATA) a conduci un estudio di capacidad di carga. E ta un forma pa proyecta den tur e añanan venidero kico nos pais por absorbe na desaroyo. E conclusion tabata cu Aruba su industria turistico mester bay den direccion di desaroyo estilo boutique hotel, cu excepcion di San Nicolas.

E ta haya cu obviamente nos tur a prefera pa bin cu boutique hotel na San Nicolas. Kier men bin cu un desaroyo den fase, pero un di e retonan grandi ta cu tur inversionista cu gobierno a acerca pa e tereno cu tin disponibel pa desaroyo pa bin cu boutique hotel tabatin obhecion. Nan obhecion tabata cu nan ta bay inverti den un boutique hotel chikito, pero no tin trafico, ni volumen di hende, y tampoco movecion. Nan ta mira cu esaki ta un risico hopi grandi. P’esey a opta pa bin cu un proyecto hotelero di 600 camber, asina el a compronde for di su colega di infrastructura.

E ta bisa cu importante den e proyecto aki y cualkier otro proyecto, ta pa nos por garantisa cu nos por conserva nos naturalesa y medio ambiente. Pero tambe cu nos crea empleo pa nos hendenan local mes. Ya cu tin hende actualmente cu pa cualkier motibo nan ta sin trabou den e momento aki. Nan por bin na remarca pa tur e trabou cu tin. Nan ta e tipo di criticanan cu a wordo haci y esaki ta loke e analisis di capacidad di carga a trece dilanti. Kico nos pais por absorba y nan a exclui San Nicolas –segun e mandatario – ya cu tur e tereno pa bin cu e hotel grandi aki, semper bou tur gobierno di cualkier signatura, nan tabata tereno destina pa desaroyo hotelero.

E no ta nenga cu un proyecto asina su impacto ta grandi, ya cu nos tin cu conserva y cuida nos medio ambiente y naturalesa. Sinembargo, el a declara cu e proyecto aki lo ta localisa den un area cu den e ultimo tres decada semper tabata destina pa un desaroyo hotelero. E ta un tema cu a wordo trata pa añanan, pa bin cu un prome hotel pa San Nicolas y e ta spera cu esaki ta e caso, y mirando tur e indicacion cu tin e por bira un realidad. Ya cu e proceso di screening realisa pa VDA a sali positivo y Banco Central di Aruba a duna un conseho positivo pa e inversion miyonario aki por tuma luga.

Un proyecto asina tin un efecto complementario, mirando tur esfuerso y inversion cu ta wordo haci pa bin cu un oficina di turismo na Baby Beach y tambe na Rodgers Beach, nan ta bay mehora tur infrastructura, segun e mandatario a bisa na e matutino aki.