Segun declaracion di ministro encarga cu asunto di energia, Glenbert Croes, durante su bishita na Spaña a haya orientacion encuanto e proyecto di hidrogeno na Mallorca. Segun e mandatario riba su pagina di Facebook, Aruba lo por bay realiza un proyecto parecido cu lo abarca un produccion di energia electrico necesario di cinco biaha esun cu ta desaroyando na Mallorca.

Redaccion di Bon Dia Aruba a averigua un que otro riba e website di e proyecto (Power to Green Hydrogen Mallorca) unda ta duna e informacion basico di e proyecto. Ta trata di un proyecto piloto cu e grupo internacional Acciona ta conduciendo, den un alianza cu empresa Enagas (Spaña) y otro compania, pa produci hidrogeno den un planta di electrolisis, a base di energia procedente di dos parque solar. E empresa ACCIONA ta un grupo global cu ta desaroya y maneha proyecto di infrastructura sostenible, specialmente riba tereno di energia renovable, di diseño te na operacion y mantenimento, segun nan website. E consorcio tin un presencia den mas di 40 pais y un turnover di €11,195 biyon na 2022, segun nan propio informacion.

Intencion ta pa usa e hidrogeno den varios aplicacion na e isla. Entre otro lo bin un stacion di servicio pa hidrogeno na e isla, y ta contempla e uso di hidrogeno den transporte publico (bus) y pa e flota di rental car. Tambe uso di hidrogeno den calefaccion y energia electrico pa edificio publico y comercial y den operacion di ferry y otro aplicacion portuario. Ademas, parti di e hidrogeno lo ser mezcla cu gas natural y inyecta den e red di distribucion di gas di e isla, loke tambe lo reduci emision di CO2 den e uso di gas.

E dos parquenan solar ubica den e municipionan Lloseta y Petra, lo tin un capacidad di 6.9 y 6.5 MW respectivamente. Nan lo produci suficiente energia electrico renovable pa e planta di hidrogeno ‘berde’ cu lo genera y distribui mas di 200 ton di hidrogeno pa aña, segun e website.

 

Proyecto na Aruba

Segun declaracion di ministro encarga cu asunto di energia, e proyecto na Aruba lo abarca un produccion di sigur cinco biaha e produccion di energia na Mallorca. Manera menciona, e parquenan contempla na Mallorca lo produci por lo menos 13,4 MW conhuntamente. Cinco vez e nivel aki ta implica por lo menos 65 MW di coriente. Pa por compara: Aruba tin un produccion continuo di alrededor di 110 MW. E parque di molina di biento na Vader Piet tin un contribucion actual di 24 MW y e parquenan solar di aeropuerto y na refineria conhuntamente tin un capacidad di alrededor di 9 MW. Sin embargo, segun e propio informacion di WEB Aruba NV durante 2022 e parti di energia solar a contribui menos di un porciento di e total di mas di e 110 MW di produccion average; cu otro palabra: ambos proyecto ta para…

Pa yega na un produccion di energia renovable pa e proyecto di hidrogeno ta necesario anto produci mas di dos biaha e capacidad di e parque di molina na Vader Piet, o alrededor di siete (7) biaha e capacidad di e parquenan solar na aeropuerto y na tereno di refineria. Esaki lo por produci cerca di mil ton di H2 pa aña, tumando como punto di salida e 200 ton proyecta na Mallorca. Esaki riba su mes ta yama pregunta. Den un analisis reciente (24 di maart 202) Bon Dia Aruba a publica tocante un proyecto di hidrogeno na Colombia, cu ta proyecta produccion di algo mas di 1500 kilo di hidrogeno pa aña den e fase inicial mientras cu despues ta proyecta un produccion di 15 ton di hidrogeno pa aña. Mil ton pa aña ta parce por lo menos bastante optimista pa un proyecto na Aruba.

Na e momento aki no ta conoci ainda kico ta e aplicacionnan contempla na Aruba. Manera e proyecto na Mallorca ta indica, por usa hidrogeno pa mezcla cu gas natural pa e aplicacion cu gas natural lo bay tin, esta den uso na WEB Aruba NV. Tambe por aplica hidrogeno como backup pa produci coriente. Sin embargo, lo mester spera reaccion di expertonan si esey ta factible y recomendable.