Irwin Peret ta e desaroyo nobo di e proyecto conoci como Harbor House, pero e ta e mesun proyecto di condominio y local comercial pero cu diferente cambio cu den pasado nos a conoce como Marazul.

Despues di un findishi e compania cu ta subsidiario di Peret Ingeniero a dicidi di rescata e proyecto aki. Durante e ultimo añanan e proyecto aki a cay den un spiraal di tur sorto di dificultad entre nan financiero for di tempo cu e ex empresario Clyde Harms a bin cu e idea original bou e nomber di Aquamarina Bay pa Harms Brother na 1989.

“Esaki ta un edificio cu a pasa hopi aña distressed. E hendenan no tabata kere den e edificio aki. El a conoce varios findishi,” sr. Peret ta splica. El a agrega cu actualmente nan a cumpra e edificio aki den findishi durante un evento publico y e titulo di propiedad cu nan tin ta uno fuerte. Pues a base di e titulo aki nan ta realisando un inversion substancial. Tambe el a splica cu na momento cu nan a cumpra e edificio aki, e propiedad menciona a keda liber di cualkier hipoteca of ‘claim’ di pasado. “Esaki ta un di e rason nan pa kico nos a cumpra.”

E desaroyado ta declara na Bon Dia Aruba cu nan ta un compania serio y responsabel, estableci pa mas cu 15 aña na Aruba. Nan a yega di realisa diferente proyecto manera Oceania, Azul y Blue. Awor nan a tuma over e proyecto aki di Harbor House cu un inversion di 30 miyon dollar cu lo beneficia e zona aki cu tabata practicamente bandona. Ya caba nan a ilumina e area aki.

E ta considera cu e edificio aki lo bira un suceso debi na su localisacion y tambe pa e cambio di arkitectura cu a sufri durante su metamorfosis. E lo ta un arkitectura mas moderno y atractivo compara cu esunnan na Europa y Merca. E proyectonan cu nan a logra realisa no solamente na Aruba sino na Venezuela ta uno caracterisa pa su innovacion y aspecto ecologico.

Proyecto Harbor House
Awor nan a dicidi tuma over e proyecto aki cu nan a batisa cu e nomber di Harbor House debi na su ubicacion den e area di nos waf di crucero, y tambe pa e uzo cu e edificio aki lo bay haya. Aunke ya caba tin trabou cu ta tumando luga di bashamento di cierto parti di e edificio aki, e proyecto riba su mes ta cuminsa entrante 2018.

E ta un ‘proyecto mixto’ –segun sr. Peret- ya cu e compleho aki lo ta uno comercial y residencial. E biaha aki e inspiracion arkitectonico ta mas residencial cu comercial. E ta un proyecto cu ta consisti di 94 apartamento y 19 local comercial situa den e ground floor. E parti residencial lo ta condominio cu e mesun concepto cu nan a yega di realisa den e otro proyectonan anuncia ariba.

Nan a reduci den un 25% e local nan comercial cu e proyecto anterior tabatin. El a splica cu di e total di local comercial cu nan tin, 12 di nan lo ta pa restaurantnan y tiendanan. Ademas lo tin 7 local chikito destina pa artistanan local. Nan tin pensa di huur e local aki pa un prijs mas barata y accesibel pa nos artistanan local bin cu nan obranan. Tambe e resto di edificio aki lo tin un area di 140 parkeer, kiermen 100 parkeer mas compara cu e proyecto inicial cu tabatin 40 so.

“Nos deseo ta pa Weststraat por bira un espacio cultural”, el a bisa. E ta un forma pa crea un ambiente cultural pa duna bida na e caya aki y bin cu un concepto di ‘mini Wynwood’ manera na Miami.

Fish market y Rancho
Riba e preocupacion cu ta existi entre e proyecto aki y su bisiñanan, sr. Peret a laga sa cu nan a reuni cu fundacion Rancho, y nan combersacionnan tabata uno cordial sin motibo di preocupacion. Tambe nan ta na haltura cu APA a reuni cu e fundacion aki. El a informa cu e proyecto aki ta inclui un ‘fish market’ cu tur facilidad cu lo wordo construi pa fundacion Rancho.

“Esaki lo aumenta nan actividad y duna posibilidad di comercialisacion di nan productonan.” Sr. Peret ta hopi emociona cu e proyecto di e mercado di pisca ya cu e tin un sentido historico. Den e mesun luga unda nan lo wordo construi, den pasado tabatin un mercado di benta di pisca tambe.

E mercado aki lo ta uno harmonioso cu e area aki. Nan ‘politica empresarial ta esun di traha cu e comunidad’ y nan diferente partner social. Nan ta mira e presencia di fundacion Rancho como uno ‘activo’ y di mehoracion. E ta spera cu nan por haya e mesun impresion cerca nan como un proyecto cu ta bay mehora su posicion den e area aki. Cu e hendenan di Markthallen, e seccion aki ta cay bou departamento di Santa Rosa, nan ta haya cu esaki ta un asunto mas di APA cu di nan mes. Pero na final e ta haya cu esaki lo bira un win-win pa tur hende envolvi, comerciantenan, habitantenan di Rancho, etc…

Otro partnernan y espacio publico
E proyecto aki lo forma parti integral di nos centro di ciudad. Tambe di e mega proyecto di desaroyo di e waf di crucero y ex waf di container cu APA ya caba a yega di presenta un plan master di dje. Sr. Peret a laga sa nan ta coincidi riba e mesun interes y riba un aliansa ‘win-win’.

Nan a sostene diferente reunion cu instancia gubernamental, specificamente cu APA, DIP y DOW. Nan a constitui un comite cu ya caba tin tres luna trahando pa asina evalua e forma con e proyecto aki por integra su mes na Oranjestad.

Un interes comun ta principalmente con e proyecto aki por aporta na e embeyecemento y desaroyo di e area aki, y tur esunnan cu ta forma parti integral di dje. Nan ta papiando akinan di un inversion alrededor di 1 miyon y mey di dollar den inversion di espacio publico.

“Nos ta kere hopi riba mehoramento urbano. Nos ta pensa cu e proyecto aki lo por mehora hopi e area di Paardenbaaistraat y Weststraat.”

Un factor cu nan ta tene cuenta den e proyecto aki ta e peaton cu ta un tendencia mundial importante. Den e proyecto aki e peaton tin mas prioridad riba e mesun trafico di vehiculo ya cu e lo ta un edificio integra den espacio publico. Esaki ta parti di e concepto cu APA tambe ta manehando den su master plan, kiermen integra e area residencial/comercial cu esun di e peaton biniendo cu un Linear Park.

P’esey nan ta biniendo cu un espacio publico interesante banda di e waf di Rancho. E ta un espacio publico di 15 meter di hanchura y tambe nan lo genera otro espacio publico riba J.E. Irausquin Boulevard. Pa sr. Peret esaki ta un tipo di aliansa PPP entre e sector priva y sector publico cu ta beneficia pais Aruba y tambe nan empresa como desaroyado di e proyecto aki.