Trabou riba proyecto Green Corridor lo ta drentando su fase final dentro di poco. Asina director di Departamento di Obra Publico (DOW) Marlon Croes y Alex Amalfi, project manager na Caribbean Infrastructure Company N.V. (CIC) a informa.

Manera ta conoci caba, tanto proyecto Green Corridor como Watty Vos Blvd. ta wordo ehecuta den cuadro di un Public Private Partnership (PPP). Esaki ta encera un colaboracion entre gobierno y companianan priva. Den e edicion aki nos lo elabora mas riba e caminda cu ta wordo cana ora di ehecuta proyectonan PPP.

Tanto Green Corridor como Watty Vos Boulevard ta experenciando algun retraso pa via di complicacion den proceso di ehecucion. Entre complicacion cu kabelnan di Elmar bou tera y tambe diseño di un sistema cu por lidia cu awasero den temporada di yobida e proyectonan ta cana poco atras. Aunke cu na Green Corridor, CIC ta experenciando retraso di 4 luna, pa nan como compania cu sa ehecuta proyectonan grandi na Latino America no ta straño ni alarmante cu un proyecto asina lo bin cu su retonan, segun sr. Amalfi.

‘Pa fin di aña entre rotonde di FCCA y rotonde di Codemsa mester keda cla’

Na Watty Vos Boulevard sr. Croes a informa cu DOW ta mira cu pa fin di aña nan ta spera di por finalisa e rotonde na altura di ex Codemsa. “Tabatin un retraso den e proceso unda cu na altura di Kooyman mester traha un duiker grandi ainda. E prome diseñonan tabata describi un duiker cu ta bay hundo den tera pero tabatin kabelnan di Elmar 60KV cu mester tene cuenta cu ne. E diseño di e duiker ta wordo adapta pa fit den e caretera y tuma cuenta cu e kabelnan. Pa fin di aña e pida entre rotonde di FCCA y rotonde di Codemsa mester keda cla.”

DOW tin rol di control

Pa repasa: e proyectonan PPP aki ta wordo ehecuta pa companianan di afo cu ta bin establece nan mes na Aruba despues di gana un destaho publico pa e proyecto. Na Green Corridor e compania internacional cu ta encarga cu e proyecto yama Odinsa. “Odinsa e ora ey a lanta un compania Arubano cual ta CIC. Odinsa ta 100% doño di CIC. Na Watty Vos Boulevard e compania internacional ta Mota Engil, cual a lanta un compania Arubano yama Mota Engil Aruba.” E concepto aki den terminologia PPP ta un Special Purpose Vehicle (SPV). Un compania lanta specificamente pa haci e proyecto.

Segun sr. Croes e companianan ta firma un acuerdo DBFM: Design, Build, Finance, Maintain. Pues e contratistanan aki ta encarga cu e 4 aspectonan aki di e proyecto. Despues cu e acuerdo wordo cera e companianan ta compromete nan mes pa un periodo di algun aña di ta encarga cu mantencion. Pa Green Corridor esaki ta 18 aña, mientras pa Watty Vos Boulevard e ta pa 20 aña.

Parti di e acuerdo tambe ta encera cu e companianan mester emplea pa tur e trabou un porcentahe di 95% na manpower local, cu e resto di e 5% destina pa manpower di afo.

Pues den e caso aki DOW su rol como instancia gubernamental ta simplemente di controla kico ta pasa cu e proyecto y si esaki ta cuadro cu e documentonan cu a wordo firma. “Si nos mira algo cu ta mal haci nos tin cu señala esaki cerca nan y nan tin cu drecha esaki sin gasto adicional pa pais Aruba.”

Ta claro e ora ey cu e suma cu wordo paga pa e proyectonan ta keda vast.

Compania ta wordo incentiva pa haci trabou drechi
Te hasta tin clausula den e contract segun DOW cu ta incentiva e compania pa caba e trabou mas lihe y mas eficientemente posibel, pero tambe pa no cera caminda mucho. En caso cu algo bay fout cu un caminda y mester keda drecha esaki nan ta haya un boet cual ta baha e suma di e pago cu ta wordo haci finalmente ora e proyecto keda cla. Nos por a tuma nota di esaki ora na varios altura di e proyecto enbes di cera e caminda ora algun trabou mester tuma luga, CIC ta opta pa reserva un area chikito pa por sigui trabounan.

Sr. Amalfi a informa cu e compania ta mara na e plannan cu gobierno tin pa e proyecto y e interesnan di e gobierno. “Nos ta wordo ofreci un espacio pa traha pero nos no por haci kico cu nos kier”, sr. Amalfi a expresa. Actualmente e compania CIC ta na caminda pa por termina e proyecto. Pero tanten cu e proyecto no wordo completa ‘Aruba no mester haci espacio den su presupuesto nacional pa paga nos’.

Certificado di disponibilidad

Prome cu e compania ricibi su pago, sr. Amalfi a splica cu mester drenta un proceso pa yega na un certificado di disponibilidad. Actualmente e proceso pa yega na esaki ta andando. “Nos lo bay mustra cu e caminda y henter e infrastructura cu nos a construi ta klop cu e contracto cu nos a firma.”

Tanto sr. Croes como sr. Amalfi a splica cu companianan di ingeniero independiente lo yuda DOW pa evalua con e proyecto a wordo ehecuta y con esaki ta wordo refleha bek den e contracto. “Pa prome kwartaal di 2018 nan lo mester caba cu e proyecto”, sr. Croes a bisa.