Minister di Turismo, Dangui Oduber tabata presente durante e apertura oficial di di Annual Tourism Conference Aruba (ATCA) 2019, cu presencia di nos partnernan principal di mercado Norte America, incluyendo nos principal mercado Merca, pero tambe Canada.
E mandatario a expresa cu den transcurso di e ultimo añanan, Canada a converti su mes den nos di dos mas importante mercado di turista. Esaki mirando e situacion cu a presenta na Venezuela, cu antes tabata e di dos. Sinembargo Canada a bira e di dos mercado despues di Merca, cu ta trece mas turismo pa nos pais, segun e mandatario.
E ta haya cu ATCA ta un escenario importante pa nos comparti informacion riba kico nos industria turistico tin di ofrece, pa asina nos socionan na Norte America por bende nos producto. Segun e mandatario, Aruba ta den un desaroyo sumamente positivo pa loke ta trata turismo. 2018 tabata ‘e miho aña den historia di nos pais.’ Tur indicador a demostra esaki, riba e tipo di turistanan cu ta bin bishita nos isla. Pues e ta haya cu esaki ta nifica cantidad di placa cu turista ta laga atras y cu a crece cu casi 10%.
Gateway 2030
Igualmente el a referi na diferente desaroyo cu ta tumando luga, entre otro e proyecto di renobacion y expansion di nos aeropuerto, esta Gateway 2030, cu mester cuminsa na september. El a cualifica esaki como un proyecto sumamente ambicioso, di un inversion di casi 275 miyon dollar. E ta convenci cu unabes e terminal aereo aki keda cla, Aruba lo tin e miho aeropuerto den henter Caribe.
E ta considera e proyecto aki necesario, ya cu manera ta conoci, durante fin di siman nos terminal aereo ta congestiona completamente. E ta un experiencia cu nos no kier duna na e turistanan cu ta bishita nos pais. “Nos a yega na e capacidad maximo na e momento aki. Un expansion ta mas cu necesario aworaki,” el a bisa.
Nan ta bay inverti den gate adicional. Tambe ora cu e proyecto aki keda cla, e biahero cu ta bay Merca no ta bay pasa mas door di dos punto di control, sino cu lo mantene un punto di control central so.
