E profiel di e hobennan cu ta confronta problema cu husticia mayoria di biaha ta entre otro hobennan cu no ta bayendo scol.
P’esey fundacion Reclassering conhuntamente cu otro instancia a bin cu un proyecto pa e muchanan aki bay scol bek. Pa asina e hobennan cu a cay cera of a confronta problema cu husticia por haya un di dos chens pa resocialisa pa medio di enseñansa.
Pero e proyecto aki ta den peliger di bay perdi. A presenta un cambio “straño” den e proyecto y te aworaki tin pendiente un reunion cu gobierno pa trata e asunto aki, asina directora di fundacion Reclassering, sra. Seraida Pemberton a declara na e matutino aki.
Proyecto educacional
E proyecto aki cu a wordo introduci tres aña pasa tabata permiti cu e hoben por bay scol bek den su proceso di rehabilitacion social. Esaki tabata e delaster aña, pero aworaki fundacion Reclassering mester warda un rato riba su promocion. Gobierno mester dicidi si nan ta sigui sostene e fundacion cu e proyecto aki pa wak si e ta sigui of no.
E tipo di sosten cu nan ta hayando fei di gobierno ta riba e parti educacional. E hobennan ta hayando les via “Openbare Avond Leergangen”. Pero den esaki tin cierto cambio den nan structura educacional. Esaki ta “pone cu por ta e portanan pa e proyecto por cera”, asina Pemberton a declara.
E ta lamenta si e proyecto aki ta cera su porta, ya cu e fundacion aki ta purbando di ta creativo y pa nan tin tur instrumento necesario pa por yuda e grupo aki cu ta nos hobennan cu a cay den problema cu husticia.
Mas apoyo
“Pero bo por ta creativo te hasta un cierto limite…”, el a bisa. Fundacion Reclassering mester sinti e sosten pa asina evita cu tur nan proyectonan lo por cay den otro. Ya esaki nan a yega di experiencia caba den proyecto cu nan tabatin caminda nan no tabatin apoyo riba e parti financiero y parti di gobierno pa sostene nan cu personal.
E ta considera importante pa comunidad sa cu tin instancianan cu ta traha riba e problematica di e hobennan, pero nan no por haci tur cos sin sosten necesario. “Mi ta haya cu mester di mas sosten, mester di mas instancia trahando hunto pa atende cu e problema. Esey no ta sosode na Aruba, segun directora di fundacion Reclassering.
Un promedio di un 40 pa 50% di nos hobennan cu a confronta problema cu husticia ta cay bek. Esaki ta e grupo cu e ayudo cu tin aworaki pa rescata nan fei gara di delincuencia no ta suficiente. Nan ta hobennan di un promedio di 11 pa 17 aña cu ta cay cera, pero di nan e grupo cu ta resalta mas ta esun di 15 pa 16 aña, caminda mayoria di nan ta mucha homber.
