Stichting Reclassering en Jeugdbescherming Aruba tin como meta pa duna guia na hobennan cu pa un of otro motibo tin of tabatin contacto cu husticia y pa reintegra nan bek den comunidad. Desde 1 januari 2019 a cuminsa cu e proyecto Conectando. E proyecto di reintegracion ta pa yuda hobennan pa haya trabou E proyecto ta pa maximo 20 hoben.

Den e ehecucion di su tareanan Stichting Reclassering tin contacto cu un grupo di hobennan cu, a base di resultado di proyectonan conduci den pasado, ta rekeri un aanpak diferente cu ta pas mas miho cu e retonan cu e grupo aki ta trece cune. Ta trata di hobennan entre 16 pa 25 aña cu multiple problemanan social-emotional y/o psicologico. E hobennan a cay den mal caminda /a haya nan mes den problema cu husticia, pa motibo di nan comportacion y escogencia.

E proyecto conectando ta un trayecto di reintegracion pa hobennan cu no ta bay scol, no tin trabou, no ta haci nada positivo den nan tempo liber y cu tin chens pa reincidencia. Pa yuda e hobennan aki Stichting Reclassering a cuminsa e proyecto Conectando. E proyecto Conectando su meta ta pa conecta e grupo di hobennan aki bek cu comunidad.

E proyecto Conectando ta consisti di:

  • Traha 3 bes pa siman,na un compania/ proyecto
  • Sigui un curso di habilidadnan social 1 bes pa siman,
  • Haci 1 bes pa siman un actividad y/of deporte den grupo pa asina siña e base di trabou den ekipo y disciplina.

Tur esaki ta pa entre otro yuda e hoben siña con pa comunica mas miho, con pa traha hunto cu otronan y tambe siña habilidadnan social cu ta necesario pa yuda e hoben riba e area laboral. Cu e parti laboral Conectando kier logra cu e hoben ta haya conocemento basico di un ofishi pa na final e por eherce un ofishi/trabou. E enfoke lo ta mas riba enseñansa practico caminda cu e hoben ta siña un ofishi den practica cu e meta cu e lo por haya un trabou mas lihe riba e mercado laboral. Pues no ta trata akinan solamente di engrandecemento di habilidadnan social cu ta yuda e hoben ta mas independiente riba e area personal y laboral pero tambe conocemento di un ofishi cu na final lo yuda e hoben yega na un trabou mas lihe. Tambe e hoben lo ricibi un certificado cu ta stipula tur loke cu e hoben a siña y logra. E certificado aki lo ta balor agrega pa e hoben su CV tambe.

Pa haci e conexion aki posibel, NGO’s , gobierno, institutonan social y e sector priva mester bini hunto pa asina conhuntamente por yuda e hobennan aki reintegra bek den nos comunidad.

Con abo por yuda?
E proyecto Conectando kier conecta cu companianan, fundacionnan, NGO’s, gobierno, institutonan cu ta interesa pa ofrece e hobennan aki e oportunidad pa por integra bek den nos comunidad door di ofrece e hobennan aki un ‘werkplaats’ caminda cu nan por siña un ofishi pa asina yega mas lihe na un trabou. Werkplaatsen den/na por ehempel carpinteria, traha cu cement y bloki, hardineria y mantencion.

Un otro manera ta cu e proyecto Conectando kier conecta cu personanan cu kier bira leermeester y yuda guia e hoben riba e aspecto laboral. Esaki ta encera cu e leermeester lo yuda y guia e hoben na a projectplaats/na e sitio caminda e trabounan ta wordo haci/ehecuta. E leermeester lo siña e hobennan e habilidadnan practico di e ofishi y tambe lo ta e punto di contacto pa e hoben aki riba e projectplaats. E leermeester ta un persona cu tin conocemento di carpinteria, traha cu cement y bloki, hardineria y mantencion.

E lo transferi su conocemento y experencia profesional na e hobennan y guianan durante cu e hoben ta eherce e ofishi.

Por duna aporte tambe como boluntario pa ta mentor. Un boluntario por ta mentor di un di e hobennan aki pa un periodo di maximo 3 luna. E boluntario lo sostene y curasha e hoben den logra su metanan durante e trayecto.

Si abo ta interesa pa bira leermeester, mentor of si bo kier pone bo compania disponibel pa yuda cu nos proyecto, por fabor tuma contacto cu nos. Pa mas informacion di nos proyecto tambe por tuma contacto cu nos na 582 1496 of por email nos na info@reclasseringaruba.com

Nos ta situa na caya Ernesto Petronia 21-C y nos orarionan di trabou ta di dialuna pa diabierna desde 8.00am pa 4.30pm.

Ban conecta cu otro pa asina nos por traha hunto na un beneficio mutuo pa na final conhuntamente engrandece e bienestar di e comunidad Arubiano.