E proyecto cu a cuminsa dia 22 di april cu ta tumando luga den area di Palm Beach ta yegando na su fase final, segun DOW ta bin informando riba su rednan social. E siman aki ta bay inicia cu fase 4 di e proyecto.

Pa loke ta trata e proyecto reconstruccion di caminda High Rise Hotel, DOW a informa cu “nos ta asfaltando e “toplaag” di fase 2 y 3 hunto. Awe e caminda lo keda completamente cera pa diahuebs dia 5 di september 2024 nos habri’e y nos cuminsa cu fase 4, cual ta encera entrada di South Beach te dilanti Barcelo Hotel. Fase 4 ta e ultimo fase pa e aña aki y lo tin un duracion di 11 siman.”

Recientemente, nan tambe a informa cu e fase 3 di e proyecto reconstruccion di caminda High Rise Hotel tabata bayendo hopi bon. Contratista a basha tur e banchinan, mayoria tubo ta poni bao di caminda caba y e base course riba caminda tambe basha.

Nan a haci un recordatorio pa automobilistanan pa NO parkeer riba e caminda.

E prome parti tabata encera e reconstruccion di e area dilanti hotel Riu Antilla, cu tabatin un duracion di 7 siman, y automobilistanan mester desvia riba avenida Nelson O. Oduber. Tambe lo a pone drenahe nobo y ductonan di awa preto nobo bao caminda.

Na september di aña pasa, nan tambe a informa cu e di dos parti ta mesun tipo di trabaonan cu ta wordo realisa den e prome parti, pero esaki lo ta entre South Beach y e hotel Holiday Inn.

E di tres parti tabata encera reconstruccion di e wandelpad y trottoir entre Riu Antilla te cu Holiday Inn.

DOW a informa cu inicialmente e plan tabata pa tene destaho publico aña pasa y cuminsa e cu e trabaonan di e prome parti y caba cu esaki pa final di aña, pero nan a agrega cu esaki por a logra solamente si no tabatin retraso den e proyecto pa motibo di awasero of materialnan cu lo mester bestel di afo.

Nan a splica cu teniendo na cuenta na unda e trabaonan mester tuma logra, esta e area di High Rise, materialnan cu mester bin di afo y probablemente retraso pa motibo di awasero, nan a tuma e decision di tene destaho y otorga e trabou e aña pasa, pero trabaonan pa e proyecto por a cuminsa na april di e aña aki.