Dia 28 di juni lo tin un caso cu e desaroyado encarga cu e proyecto di parke di molina na Urirama lo entabla contra pais Aruba. Esaki debi na gobierno actual su decision di stop definitivamente e proyecto aki.

E proyecto aki a haya basta contratiempo for di tempo di prome gabinete Mike Eman I, specialmente for di e habitantenan di Urirama cu a opone contra e proyecto aki argumentando entre otro efectonan contra salud di hende. Varios caso a tuma luga rond di e proyecto aki y nan ta sigui keto bay.

Ex minister di energia y actual parlamentario Mike de Meza (AVP) kende tabata basta envolvi cu e proyecto aki a declara na Bon Dia Aruba cu lo bin un caso den corte. Tambe ta corecto cu tin un acuerdo inicial firma entre e desaroyado di e proyecto na Urirama y e compania di utilidad WEB. E acuerdo aki ta consisti cu e compania cu lo construi e parke di molina na Urirama –cu ta e mesun compania cu a hacie na Vader Piet- a firma un compromiso cu e compania WEB ta esun cu ta bay cumpra nan produccion di coriente di molina di biento for di nan.

Segun e parlamentario de Meza, nan tin diferente tipo di acuerdonan pero tambe tin uno cu ta concerni na gobierno mes. E acuerdo aki cu a keda firma ta indica cu gobierno a compromete su mes pa duna e permiso pa bin cu e proyecto aki den un area protegi aki. Den e parti aki si tabatin un acuerdo cu gobierno y e proceso di permiso aki tabata canando, segun e ex mandatario.

E ta corda cu gobierno e tempo aya tabata haci tramite pa esaki bira posibel. Tocante e status legal di e proyecto aki, despues di casi 8 luna di cambio den gobernacion, e ta haya dificil pa bisa algo riba dje. “Mi ta kere cu esey bo mester puntra e prome minister di gobierno y di husticia riba dje.”

E ta kere cu e caso di dia 28 di juni proximo ta mas dirigi den direccion di gobierno pa haya e permiso di construccion di e proyecto aki, pero e proyecto aki no lo sigui mas manera gobierno di gabinete Wever-Croes a anuncia recientemente. Parlamentario de Meza a bisa cu eventualmente lo por tin otro caso riba e parti di e acuerdo cu WEB, pero e no ta sigur di esey. Pero e ta un caso publico y e ta disponibel na corte. E ta spera cu gobierno lo por duna un splicacion ariba esaki tambe.

Encuanto e posibilidad di anexa e proyecto aki cu e parke di molina existente na Vader Piet, e ex mandatario a splica cu e decision no ta facil. P’esey nan a bin cu e proyecto aki na Urirama. Esaki tabata netamente pa e caida di biento cu tin y loke e por tarda pa WEB por start su sistema back up, specialmente ora cu ta wordo uza energia alternativo.

E conseho tabata pa split e dos parkenan aki di un banda 30 mega watt y di otro banda 30 mega watt pa ora cu tin caida di biento, e por tuma un averahe di 20 minuut for di Vader Piet te e parti di Urirama.

Di e forma aki nan no lo perde tur e produccion di energia den un momento. Kiermen inicialmente bo ta perde 30 mega watt y despues ta dura bo 20 minuut pa e otro 30. E ta un tempo prudente pa asina WEB por tuma su accion haciendo uzo di su back up pa evita asina un blackout. Segun parlamentario de Meza esaki tabata producto di un analisis profundo y detaya pa medio di expertonan pa bin cu e recomendacion pa split un parke molina for di otro.

E ta haya cu si nan ta pone tur dos na Vader Piet, nan ta core e riesgo cu por tin caida di biento cu ta afecta full operacion di produccion y suministro di energia debi cu un ta cay den otro. “Esey por causa efectonan negativo pa suministracion di coriente na Aruba”, e di.