Recientemente Aruba Conservation Foundation (ACF) a anuncia e inicio di nan proyecto di monitor Cascabel di Aruba den colaboracion cu expertonan Jeff Goessling di Eckerd College na Florida y Dr. Matt Cross y su team di The Toledo Zoo na Ohio. Den un entrevista cu Bon Dia Aruba Giancarlo Nunes, Research Conservation Manager na ACF a elabora tocante e proyecto, con el a cuminsa y kico ta e plannan pa continua cu esaki.

Nunes a subraya cu Cascabel ta un topico cu ta hopi importante pa ACF y pa Aruba mes. El a conta cu den añanan 80 no tabatin un parke na Aruba ainda. Tabatin plan si pa un parke, pero e no tabata un realidad ainda. E tempo ey algun investigador experto di Merca a dicidi di bin Aruba pasobra nan a tende di e Cascabel di Aruba, cual na Aruba so tin.

E expertonan a bin Aruba, a bay full rond e isla pa papia cu hende y a haya e Cascabelnan na diferente luga, a pinta un mapa di unda nan ta biba, nan a conta cuanto tin, a haci extenso y a bay afo cu e informacion.

Como cu e Cascabel aki na Aruba so por hay’e, y no tin hopi di dje, una bes nan disparce di Aruba e ta bira un especie extincto, pa e expertonan Mericano tabata importante pa busca un manera pa scapa e colebra aki. Nan a busca colebra y a pone chip den nan pa identifica nan y asina por wak informacion di e colebra. E mesun investigadornan aki tambe a crea un programa di criadero na Merca pa den caso nan bay perdi na Aruba nan por trece nan back.

Nunes a sigui conta cu nan a keda den contacto cu e profesionalnan di Aruba di e tempo ey y for di momento cu nan a bin back combersacionnan pa traha un parke nacional na Aruba tabata andando y despues di hopi tempo tur cos a bini hunto y asina a bin Parke Arikok.

Parke Arikok a cuminsa cu algun hende cu tabata interesa den Cascabel cu eventualmente a desaroya den Parke Nacional Arikok, despues a haya un fundacion, a haya maneho, empleado, y asina a cuminsa crece y a bira e Parke Nacional di Aruba y aworaki tin Aruba Conservation Foundation.

E programa di monitor di Cascabel a stop pa un tempo, esaki, segun Nunes a splica, tabata pa motibo cu e investigadornan bira grandi, a retira y no tabata bin Aruba hopi mas. E momento ey Parke Arikok no tabata cla ainda pa carga full e proyecto di Cascabel pasobra ta un proyecto grandi cu inclui analisis di sanger, analisis di cuero, mester usa cierto aparatonan cu no tin presupuesto pe.

Pa e motibo ey e proyecto a stop pa un tempo te ora cu un stagaire, Jeff Goessling a cuminsa haci su stage na Aruba studia Cascabel y Cododo. Ora e cientificonan bieu a cuminsa retira e Goessling a termina su estudio y el a keda bin Aruba y studia e Cascabel y Cododo, cu e placa di su instituto na Merca.

Den actualidad, Nunes a indica, ACF tin bon relacion cune, e ta keda bin siña e profesionalnan na Aruba lo e sa pero a yega a un punto como organisacion cu ACF kier cuminsa enfoca atrobe riba e Cascabel pasobra pa algun tempo hende ta papia di Shoco y Prikichi y Lora, y a cuminsa lubida un tiki riba e Cascabel.

Dos aña pasa ACF a acerca e Goessling pa wak si por cuminsa haci algo cu Cascabel atrobe y asina a cuminsa papia di diferente proyecto cu ta posibel y kico ta accesibel economicamente. Despues di dialogo a bin cu e idea pa haci un proyecto mas simpel posibel, mas economico posibel, pero cu ta duna mas informacion posibel tocante con saludabel e populacion di Cascabel ta.

Nunes a remarca na final despues di dos aña di preparacion a logra trece tur experto hunto pa cuminsa papia tocante e proyecto di Cascabel y na januari di e aña aki tur hende a bin Aruba y asina a cuminsa atrobe oficialmente cu e proyecto di Cascabel pa purba haya sa con sano e populacion di Cascabel ta, con grandi e populacion ta y tambe pa actualisa e mapa di unda e Cascabel ta biba. Aworaki e mapa oficial ta un mapa hopi bieu y ta bisa cu Cascabel ta biba di Bushiribana te cu Vader Piet, mas o menos, pero Nunes a resalta cu papiando hende di Savaneta, di e area mas noord eybanda, nan sa wak Cascabel tambe, pero e mapa no ta mustra esey, kiermen mester actualisa esey.

No tin un cantidad exacto ainda, mirando cu apenas a cuminsa traha riba e proyecto di nobo, pero segun Nunes a indica, e calculacion cu tur experto ta coincidi cune ta cu tin alrededor di 200 Cascabel rond di Aruba. Un cifra cu Nunes a resalta nan lo desea pa subi.

Den nos siguiente edicion les mas informacion tocante e Cascabel, con pa atende na momento cu topa un Cascabel y con pa yuda proteha e especie unico aki.