Diahuebs mainta ariba e tereno di APA durante un conferencia di prensa, Minister di Turismo y Salud Publico, Sr. Dangui Oduber, hunto di CEO di Aruba Port Authority (APA), Sr. Mark Figaroa a anuncia e proyecto di dragamento di mantencion na waf di Oranjestad y proyeccionnan di crucero pa e aña aki.

Oduber a cuminsa e conferencia indicando cu pa hopi tempo APA a traha riba un master plan y cu pa prome biaha den historia, APA a presenta un vision, un master plan, hopi cla di unda nan ta y unda nan kier bay den un futuro hopi cercano. Den e plan aki, segun Oduber a splica, nan a presenta diferente desaroyonan interesante pa stimula e economia, crea entrada pa APA y tambe pa Gobierno y crea cuponan di trabao.

 

Oduber a menciona cu pa e ultimo dos aña APA tabata hiba diferente combersacion cu diferente liña di crucero ariba con pa percura pa e canalnan di e waf ta apto pa acomoda e mega-cruceronan. E intencion tabata dos aña pasa caba pa percura pa haci un limpiesa total den e canal di waf pa acomoda e mega-cruceronan. Pero pa motibo di e pandemia di COVID-19 e ultimo dos aña aki e inversion no por a wordo concretisa, e no a wordo haci pa retonan financiero cu APA tabatin.

“E motibo pakico nos ta para ‘kinan awe ta pa anuncia un proyecto, sigur cu ta cuadra cu e vision y maneho cu Gobierno kier hiba. Nos ta contento cu e siman aki oficialmente e trabaonan di dragamento a cuminsa pa percura pa haci un limpiesa total den e canal aki y di e forma aki crea e oportunidad y espacio pa acomoda e mega-cruceronan, den e caso aki e Oasis class di Royal Caribbean Cruiseline”, Oduber a indica.

El a splica cu e inversion ta un suma di 1.6 miyon florin cu ta bay crea oportunidadnan pa e mega-cruceronan trece miles di turista cu lo yuda taxista, operadornan di tour y centro di ciudad creando un spin-off economico. “Nos ta haci un inversion pa crea oportunidad y esaki ta conforme e declaracion cu nos a haci pa aña 2022 como Gobierno di Aruba, cu ta bira un aña di inversion y di oportunidad”, el a agrega.

El a subraya cu parti di e vision di APA ta, y conforme e maneho cu Ministerio di Turismo kier hiba, ta pa desaroya henter e area di e tereno di APA den e asina-yama proyecto “Port City”. Segun e Minister a indica, e ultimo añanan aki a haci tur e preparacionnan necesario pa por cuminsa ehecuta e proyecto di Port City.

Oduber a splica cu proyecto aki ta bira un proyecto di un inversion di 500 miyon dollar di sector priva. E entradanan cu wordo genera pa medio di e proyecto aki APA ta inverti back den mantencion, den capacidad di infrastructura y lo percura tambe pa e wordo manteni pa e siguiente añanan cu ta bin.

El a indica cu nan ta yegando e ultimo fase den tur e negociacionnan cu tabatin cu departamento di infrastructura pa traspasa e ultimo terenonan cu tin cu wordo traspasa pa APA y na momento cu esaki ta cla lo bay over na un destaho publico pa asina APA bay aloca e prome e parcela pa e proyecto aki inicia.

“E ta bira un proyecto cu un masterplan di 15 aña, pero e intencion ta pa nos cuminsa cu e proyecto e aña aki. Port City sigur ta bay crea hopi oportunidad economico pa pais Aruba, e ta bay crea cuponan di trabao, e ta bay crea entrada pa APA y e ta bay crea entrada pa Gobierno di Aruba. E ta un proyecto cu nos a traha riba dje pa hopi aña y nos ta considera APA como un di e NV cu tin un potencial enorme pa yuda crea e spin-off economico cu nos mester di dje despues di dos aña hopi dificil pa nos pais”, Oduber a agrega.

El a remarca cu APA tin e terenonan na Barcadera tambe cu pa hopi aña no a haci mucho cos a cu nan. El a splica cu den e masterplan tin un plan specifico pa desaroya henter e area di Barcadera pa un area di logistica y warehousing. “Dentro di poco nos lo informa comunidad tambe kico ta e plan specifico pa cu e terenonan di APA na Barcadera. Nos ta convenci cu nos ta mira un potencial entre den APA pa keda haci e inversionnan necesario, percura pa keda enfoca ariba turismo crucero, percura pa enfoca ariba e modelo nobo di real estate pa cu Port City y tambe e terenonan cu tin disponibel na Barcadera”.

Sr. Figaroa a splica durante e conferencia cu e proyecto di dragamento di mantencion cu ta encera haci e limpiesa di e canal ta un proyecto conhunto entre un compania local, Varadero Caribe NV conhuntamente cu e compania Ocean Group di Canada cu lo ehecuta e trabao aki den preparacion pa e mega-crucero Oasis Class.

Ta premira cu e mega-crucero lo bin Aruba e prome siman di mei y pa APA, segun Sr. Figaroa a expresa, e ta un logro grandi pasobra ta prome biaha cu e tipo di barco aki lo ta yegando Aruba of den e region aki. “E plannan ta sumamente positivo pasobra lo ta bay tin hopi mas call\di e tipo di barconan aki den e añanan binidero, dus e ta sumamente importante cu e trabaonan aki ta wordo haci”, el a bisa.

Pa loke ta trata turismo crucero, el a splica cu APA a cera 2021 cu un total di 136 mil pasahero cu ta 16% compara cu 2019 cu tabata un aña record unda cu nan a ricibi 831 mil pasahero. El a sigui splica cu na januari nan a enfrenta un cancelacion di 15 call cu ta casi 30% di loke cu tabata planea pa yega januari y gran parti tabatin di haber cu e situacion di COVID aki na Aruba.

“Nos ta spera cu esey ta pasado y nos ta mira den futuro aworaki cu nos por recupera, si tur cos sigui bon y si nos no haya un otro ola, unda cu nos lo recupera mas o menos 60% di nos mercado back”, Figaroa a indica.

El a menciona cu e intencion tabata cu pa fin di april, comienso di mei, mayoria crucero lo ta full operacional back cu flotanan completo y conforme nan schedule, pero a causa impacto den e mercado di crucero y data ta indica cu den luna di juni lo por wak atrobe cu e cruceronan ta back full operacional. Esey kiermen tambe cu e cruceronan lo ta biniendo cu un capacidad di 100% tambe. Na e momentonan aki nan ta na un 70% di capacidad pa motibo di distanciamento social y tur e protocolnan di salud cu tey pa evita contagio ariba barco.