Diabierna ultimo miembronan di parlamento a ricibi un proyecto di ley, cu ta trata un convenio cu gobierno ta desea di cera cu e consorcio denomina ‘Citgo’ pa determina responsabilidad relaciona cu e finalisacion di e actividadnan di e companianan di Citgo cu tabata activo na Aruba. E parlamentarionan a haya te diaranson pa presenta pregunta.

E convenio lo ta cu CITGO Aruba Holding LLC, Citgo Aruba Refining NV, Citgo Aruba Terminal NV, Citgo Aruba Supply NV, Citgo Aruba Marine Operations NV y PDV Holding Inc. Y di banda di Aruba,ministerio di Asunto General y Energia, ministerio di Finanzas y Asunto Economico, y ministerio di Desaroyo Teritorial, Infrastructura y Medio Ambiente, lo participa na nomber di Pais Aruba.

Den e Considerando di e ley ta bisa:

“Cu Citgo Aruba Holding LLC, Citgo Aruba Refining NV, Citgo Aruba Terminal NV, Citgo Aruba Supply NV y Citgo Aruba Marine Operations NV, relaciona cu esey a duna di conoce na Pais Aruba y na Refineria di Aruba NV, cu nan no ta capaz mas di cumpli cu nan obligacionnan pa cu e Definitive Participation Agreement y pesey ta pidi pa terminacion di e Definitive Participation Agreement y di e otro convenionan relaciona.”(E Definitive Participation Agreement ta e contract original firma dia 10 di juni 2016 na Caracas; red.)

Tambe: “Cu por lo tanto ta deseable pa cera cu Citgo Aruba Holding LLC, Citgo Aruba Refining NV, Citgo Aruba Terminal NV, Citgo Aruba Supply NV y Citgo Aruba Marine Operations NV y Refineria di Aruba NV un “vaststellingsovereenkomst’ yama “Termination Agreement” pa areglo di, asina leu cu ta necesario, e consecuencianan di derecho civil di e terminacion di e Definitive Participation Agreement y e convenionan relaciona.”

Tambe ta considera cu den e actual situacion lo no bin cambio rapidamente, mirando e situacion cu e grupo Citgo ta aden, y cu mester garantisa un bon funcionamento di e terminal di petroleo y e suministro di combustible na Aruba, tumando na cuenta e deterioro di e instalacionnan.

Den (e unico) articulo 1 e ministronan menciona ta haya autorisacion di Staten pa cera e convenio di establecimento, cu un interes financiero di US$ 175 miyon, cu ta e garantia cu PDV Holding ta duna Aruba, y Refineria di Aruba NV, pa cumplimento di e debenan pendiente di e diferente companianan na Aruba, cu ta coresponde cu nan obligacionnan bao di e Definitive Participation Agreement y e demas contractnan relaciona cu esaki. Entre e ultimonan aki tin en todo caso e garantia di PDV Holding Inc. na Aruba y Refineria di Aruba NV, segun e texto.

Den su reaccion riba e proyecto di ley Raad van Advies (RvA) a puntra pakico gobierno a scoge pa e caminda aki envez di haci uso di e “Umbrella Dispute Settlement Agreement” cu ta parti di e convenio di 2016 y a pidi un splicacion, no cu nan ta recomenda e ruta aki.

Den su contesta Prome Ministro ta splica cu e caminda ey por bira hopi largo, complica y ademas sin un garantia di exito. E parti aki di su contesta el a incorpora den e Memorievan Toelichting riba recomendacion di RvA.

Tambe e ta splica cu e Termination Agreement tin elemento di un ‘kwijtschelding’ como tambe di un ‘dading’ cu ta un acuerdo unda tur dos banda ta cede. Pais Aruba y Refineria di Aruba NV ta cede den esaki acreencia cu tin pendiente di parti di PDV Holding y e otro companianan di e grupo. E grupo lo ta cede su derechonan pa cu Pais Aruba relaciona cu e procedimento describi den e Definitive Participation Agreement. Esaki tin un limite maximo di US$ 150 miyon.

E partidonan a yega na un acuerdo pa laga un experto externo traha un ‘baseline study’ di e situacion encuanto medio ambiente na momento di inicio di e operacion di e companianan na Aruba. Ta bisa cu no por duna un suma exacto pa esaki, pero ta anticipa cu esaki lo no ta tanto pasobra en realidad Citgo no a yega na cuminsa opera riba e tereno. (Ta supone cu e US$ 25 miyon aki ta pa cubri e parti aki; red.)

Asina a yega anto na scoge pa un asina yama vaststellingsovereenkomst, segun articulo 900 di Boek 7 di Codigo Civil di Aruba, cu ta un convenio den cual e partidonan ta cera un convenio pa terminacion di contract o pa evita un disputa entre nan encuanto loke ta vigente legalmente entre nan.

Nota di redaccion:

Cu e acuerdo aki, gobierno ta pensa cu por yega na un acuerdo mas rapido. E otro banda ta cu Aruba den esaki ta cede e clausula di incumplimento di e contract original, como partido perhudica. Citgo ta haya un ‘break’ di 50%, unda e suma den e contract original tabata US$ 300 miyon.