Proyecto di ‘ley estatutaria’ cu ta defini como prome ley di su clase pa un derecho social y ta reconoce salud como derecho fundamental, ta busca reglamenta eutanasia na Colombia. Esaki a haya impulso di e congresista Juan Fernando Reyes Kuri y pasa su prome debate na Camara cu un votacion di 24 voto na fabor y 12 den contra.
E representante a pronuncia riba red social Twitter diaranson ultimo y a bisa cu “ta un gran logro pa e libertad na Congreso, nos ta riba e caminda corecto pa e construccion di un Colombia na unda nos lo ta #LibresDeVerdad”. Te ainda, e caminda ta keda ta largo, ya cu tin otro debate na Camara pa pasa pa prome comision di Senado, despues e plenario y finalmente, revision di Corte Constitucional y sancion presidencial.
Di esaki, e Representante Liberal di El Valle a bisa cu e ta sinti optimista, pero tin miedo di loke por pasa. “Ta un tema hopi dificil. Ta un tema personal, na unda hende te ainda ta kere cu esaki no mester wordo haci; sinembargo, cada biaha mi ta haya un miho panorama di e proyecto. Ta impresionante e cantidad di hende cu a manda un mensahe pa gradici mi pa e proyecto, hopi mas cu cinco of dies aña atras”.
Na 1997, Corte Constitucional a legalisa eutanasia y a pidi Congreso pa legisla riba dje. Desde e momento ey a presenta 12 proyecto di ley relaciona cu e derecho fundamental aki, pero tur di nan a sink. P’esey, mediante resolucion 1216 di 2015, Ministerio di Salud y Proteccion Social a reglamenta eutanasia y a dicta e direccionnan pa conforma comite cientifico-disciplinario pa e derecho di muri dignamente, den cumplimento cu sentencia T-970 di 2014, di Corte Constitucional.
Sinembargo, esaki no ta suficiente pa personanan por tuma e decision, ya cu no tin un ley pa cubri e buraconan den materia di implementacion y solicitud. P’esey desde 2015, na Colombia a practica 92 eutanasia so, segun Ministerio di Salud, tur pa persona mayor di 18 aña.
