Proyecto di Formacion Social pa yuda hoben haya su caminda

Formacion social SVT (Sociale Vormings Traject) na marinierkazerne Savaneta ta preparando pa e programa 2020. Nan ta curasha pa hobennan cu ta interesa inscribi y por tin otro oportunidad den comunidad.

Coordinador Sociale Vorming, Jessica Ras a duna di conoce cu e grupo di aña pasa (2019) a pasa a cuminsa cu 20 hoben, di cual 10 di nan actualmente ta haciendo e proyecto. Nan ta satisfecho cu esaki.

Nan a finalisa e prome parti cu exito y awo ta coriendo e parti di stage te cu luna di april. E 10 hoben ta haya diferente curso di Enseñanza pa Empleo. Ras ta expresa cu den e caso aki nan ta bisa cu 10 no ta un number abou.

“Bo ta traha cu hobennan anto pa motiva nan ta keda dificil. Tambe den e prome parti ora a cuminsa, e prome siman algun ta cay afo tambe, pues ta un custumber. E ta un cambio di bida, un otro comunidad”, Ras a splica.

Na kazerne nan no tin ‘un bida dushi mas’. Nan tin cu lanta 5am y haci nan cierto tarea, anto esey ta keda dificil pa e hoben adapta. Na comienso tabata hopi, pero despues a haya hende cu a cay afo. “Nos ta satisfecho cu ta 10 a keda pasobra e ta 50% pues e ta bon.”

Pa 2020 a haya e fecha di 25 februari pa cuminsa cu e grupo. Nan a cuminsa for di aña pasa cu e parti di inscripcion y awo ta bezig promocionando e grupo, hoben of mayornan cu tin hoben por wak cu e proyecto ta uno positivo pa nan.

Formacion social ta pa e hoben cu no ta haciendo nada na cas of ta na cas constantemente, of riba caya. Nan ta conseha pa bin aplica pa e hoben mas pronto posibel, pa motibo cu tin algun procedura pa nan por participa den e proyecto.

A base di nan inscripcion nan ta haya mas informacion y ta cuminsa cu actividad dia 25 di februari. Ras ta comparti cu mayornan ta hunga un rol importante pa motiva e hoben. Tin cierto hoben cu ta mira cu no tin interesa pa participa, pero nan ta mira cu tin actividad y experiencia cu ora nan haci e actividad fisico, nan ta wak e kazerne diferente.

A puntra Ras kico ta opcion cu e hoben tin despues di participa den un proyecto asina. Ras ta contesta cu esaki ta varia, pasobra tin algun hoben cu kier haci e parti di Arumil, pero locual ta pasa cu kazerne ta keda exigi cu pa drenta mester tin diploma.

Pa motibo di esaki, nan ta keda motiva e hoben cu si tin diploma pa keda scol, pa asina por drenta den seleccion di parti di Arumil. El a menciona un hoben cu tabata gusta e parti di kazerne y militar. E ta bayendo scol anochi y ta positivo pasobra e kier drenta Arumil.

Ras ta duna di conoce cu tin hoben cu kier haci esey y tin algun cu ta bay traha despues di e proyecto. “Na e luga cu nan stage, nan ta wak kico nan kier haci of si na e mesun stageplek nan ta haya trabou. Nan ta keda busca e interes cu nan tin. Tin hopi cu kier bay scol bek y nan ta bay busca informacion. E ta keda na cada hoben pa dicidi kico nan kier haci despues di e trayecto.”

Pa e hobennan cu tin awo, nan ta bay guia esunnan cu ta bay cuminsa cu e trayecto. E ta bisa cu nan ta haya esaki un motivacion pa nan mes, pa motibo cu nan kier wak cara nobo. Pero nan ta motiva pa ora e grupo cuminsa y ta un reto pa nan tambe.

Tambe tin di nan cu a pasa den e mesun proyecto y nan ta bin papia cu e grupo pa duna nan palabra di nan experiencia. “E ta bon pa asina nan mira e proceso di otro y mira nan como un role model. Pa asina e bira mas trankilo y ta custuma. Di e forma aki e ta bay miho.”

E proyecto ta pa hende homber entre 18 cu 24 aña di edad. El a enfatisa cu no ta solamente pa dropout, pero pa hoben cu a finalisa un studio caba, manera un Mavo of EPB cu ‘no a haya chens eyfo’ y tin interes pa Arumil, pero no ta drenta lihe.

Sinembargo e ta bisa cu tin cu sigui pusha y no demotiva. E inscripcion por bay personalmente of yama oficina na 522-5352 pa haci afspraak of via email na info.formacionsocial@gmail.com. Tambe riba nan pagina di Facebook Formacion Social SVT.

E duracion di proyecto ta pa un aña largo, durante cual e hoben ta keda den kazerne pa 4 luna y despues ta bay 8 luna pa stage y haya diferente curso.

Pa finalisa, Ras a bisa cu SVT por ta un trampolin y chens lo bira mas grandi pa por drenta Arumil of haya mas experiencia den trabou. Pa ora nan caba nan ta mas stabiel y por haya un trabou mas lihe.