Proyecto di formacion social pa hobennan: ‘No laga locual bo por haci awe pa mañan’

Formacion social SVT (Sociale Vormings Traject) na marinierskazerne Savaneta ta preparando pa e programa 2020. Nan ta curasha hobennan cu ta interesa pa inscribi y por tin un otro oportunidad den comunidad.

Coordinador Sociale Vorming, Jessica Ras a duna di conoce cu nan ta bezig cu inscripcion y lo tin anochi di informacion pa esunnan cu tin interes pa aplica pa e anochi di trabou, cu ta bay tin informacion di kico e ta encera pa nan cuminsa e trayecto.

E anochi di informacion lo ta pa tur esunnan cu tin interes, of sa di algun hoben cu por haci bon uso di e proyecto aki, un famia manera wela of tanta. Un bisiña hasta cu conoce un hoben, nan por acerca e anochi y informa otro, pa asina ta di motivacion pa nan.

STV ta pa tur hoben di 18 pa 24 aña di edad. E ta keda na responsabilidad di e hoben, mirando cu nan ta mayor di edad. Sinembargo Ras ta bisa si cu famia por ta un empuhe pa e homber por inscribi.

E prome anochi informativo lo tuma luga na MFA Santa Cruz di 7:30 pa 8:30pm y e di dos anochi informativo lo ta na MFA Noord, e mesun orario. E hoben por bin cu nan AZV y ID.

Jean Pierre Janga a conta un tiki di su experiencia den trayecto, cu tabata ‘dushi experiencia’. E mester a train 4 luna pa despues e core stage. El a gusta mas e parti di training militar. Den su experiencia Janga ta un ‘drop out’ y el a cuminsa busca trabou y a haya un den un warehouse pa dos aña.

Su soño semper tabata pa drenta militar, pero pa motibo di no a caba su estudio, e no por a drenta. El a wak cu tin e trayecto di SVT anto el a dicidi di purba. El a sigui y gusta locual a pasa aden. “E trayecto a habri mi mente y mi ta bezig cu scol bek y luchando pa mi soño.”

Janga ta bisa cu a cuminsa cu 20 persona y awo na 10. E ta bisa cu persona ta kibra pasobra ta depende riba nan mes, e no ta facil y cu ‘tur cos ta cay for di shelo’. E ta agrega cu cosnan den bida ta duro pero na final e ta yuda como persona ta mas contento. Tin cu keda pusha pa bay dilanti y cu pasenshi.

E ta duna conseho pa tur esunnan cu ta na cas, of no a caba scol y no sa kico pa haci, pa drenta un SVT asina nan por logra bay p’e y pone meta dilanti. Cuminsa awo, ‘no laga locual bo por haci awe pa mañan’.