Un biaha mas minister Andin Bikker a expresa su deseo den nomber di gabinete Wever-Croes pa introduci un servicio di fast ferry entre Aruba, Bonaire y Corsou of islanan ABC.

E proyecto aki no ta relaciona absolutamente cu Venezuela, segun e mandatario cu e intencion cu tabatin un grupo di empresario Venezolano pa bin cu un servicio di ferry tambe for di nan pais y incluyendo den nan ruta e islanan ABC. “Ningun momento den e plan carga pa parlamentonan di St. Maarten, Corsou, Aruba y Hulanda ta tin e dimension di Venezuela.”

El a aclaria cu un grupo priva di Venezuela a bin cu nan propio iniciativa pa bin cu un servicio di ferry entre Venezuela y Aruba. Esaki ta completamente separa di esfuerso haci for di parlamentonan di paisnan di Reino Hulandes.

Proyecto
E concepto di e proyecto aki ta un servicio di ferry cu preferiblemente lo tin su infrastructura na San Nicolas, unda e lo sali pa yega for di e punto mas cerca entre Aruba y Corsou den un trayecto di no mas largo cu 1 ora y 40 minuut.

E por transporta entre 300 pa 400 pasahero, 200 auto y 80 vehiculo di carga. E servicio aki lo sali tempran den oranan di mainta pa regresa den oranan di atardi Aruba. Nan ta premira cu lo ta un servicio diario. E ferry aki lo ta basa riba e modelo cu ta funcionando pa 20 aña caba na Isla Canarias.

E mandatario a haci un bishita recien na Corsou unda el a tuma contacto cu su coleganan cu ta masha entusiasma cu e proyecto aki. Tambe antes nan tabata parlamentarionan cu a bin promove e idea aki y e palabracionnan cu a wordo haci for di 2012 bin ariba pa introduci e servicio di e ferry. Esaki a wordo haci den seno di reunion di IPKO of encuentro inter-parlamentario entre Hulanda, Corsou, St. Maarten y Aruba. St. Maarten tambe ta interesa ya cu nan ta desea riba mesun plataforma aki di por haya un servicio entre Saba, St. Eustasius y St. Maarten mes.

Ya caba for di 2016 un grupo impulsa pa Hulanda a traha un rapport pa identifica kico mester tuma luga di parti di e islanan pa por introduci un servicio di ferry. Pa establece un servicio asina mester tin un waf disponibel. Segun e mandatario ya caba hunto cu minister di Infrastructura nan a cuminsa explora e areanan na San Nicolas cu ta bou control di gobierno pa bin cu e waf si e proyecto di e fast ferry ta wordo concretisa.

Tambe cierto aspectonan relaciona cu siguridad cu mashin biometrico pa por controla den un forma rapido y eficiente tur persona cu ta subi y baha di e ferry aki. E ta casi un sistema similar di e asina yama happy flow uza den aeropuerto.

E mandatario a laga sa cu nan ta cumpliendo cu e prome pasonan di e acuerdo di gobernacion pa loke ta trata e fast ferry. E ta haya cu un proyecto asina aki lo engrandece nos economia, y specialmente lo trece un empuhe den e area di San Nicolas. E districto aki ta pasando den retonan grandi for di cu e reapertura di e refineria ta den stand bay aworaki.

El a indica cu estudio cu a wordo haci ta a base di crecemento economico riba otro paisnan cu a introduci e tipo di servicio aki. Considerando cu nos tin un poblacion di alrededor di 110 mil habitante y plus 1.8 miyon turista pa aña, esey ta e mercado pa e ferry. Unabes cu tin un mercado grandi e gasto di produccion ta baha. Nan ta factornan cu nan tin den consideracion pa bin cu e servicio di ferry pa e islanan ABC.