Ayera mainta a keda anuncia e proyecto Eagle Beach Strip Enhancement pa minister di Turismo y Salud Dangui Oduber. A informa cu esaki ta forma parti di tur e plannan cu nan ta bin haciendo for di lunanan pasa pa embeyecemento di producto Aruba.

Na momento cu a proba e presupuesto di Tourism Product Enhancement Fund (TPEF) pa aña 2022 tabatin den dje e fondonan disponibel pa ehecuta diferente proyecto. Dialuna ultimo segun minister Oduber a informa a trata e presupuesto di 2023, e cual tambe a wordo aproba di manera unanime pa tur fraccion di partidonan den parlamento.

“Akinan a wordo demostra cu ora tin proyectonan cu ta na beneficio di producto Aruba, di pais Aruba, tur partido politico ta haya nan mes aden y esaki ta loke a sucede ayera, cu tur fraccion a aproba e presupuesto di TPEF pa 2023 cu tin diferente bunita proyecto pa embeyecemento, upgrade y enhancement di producto Aruba,” el a bisa.

Den ultimo lunanan den comision di infrastructura cu ta consisti di Ministerio di Turismo, ATA, TPEF, DIP, DOW, DNM, ta haci palabracionnan concreto di tur accion cu mester tuma luga pa asina bay na ehecucion di tur e proyecto cu tin riba e planning conforme e maneho di ministerio di Turismo.

E proyecto aki cu ta bay cuminsa den proximo dianan y ta bay inicia for di e rotonde di hotel Amsterdam Manor Beach Resort y ta bay yega te cu rotonde di Alhambra, na unda segun minister a sigura, nan lo percura pa un landscaping ta uniforme, organisa y structura den henter strip. Esaki ta consisti di seis lote, e prome ta bay cuminsa na e parking area banda di rotonde di Amsterdam Manor. Edi dos lote ta acapara e area dilanti e hotel aki, di tres lote ta dilanti di La Cabana Beach Resort, di cuater ta dilanti Paradise Beach Villas, di cinco y di seis lote ta cuminsa for di hotel MVC Eagle Beach Aruba te cu O’Condominium.

“E proyecto aki ta wordo financia parcialmente pa TPEF cu presupuesto di aña 2022 y tambe di Aruba Tourism Authority,” minister Oduber a sigura.

E fase dos lo cuminsa for di O’Condominium te cu rotonde di Alhambra ta bay wordo financia cu e presupuesto di TPEF pa aña 2023, ademas, el a sigura cu den e proyecto aki sector publico y sector priva ta bay traha cu otro y ta financia esaki cu un ‘public private partnership’ debi cu den e caso aki sector publico ta haci e inversionnan por medio di e fondonan cu tin disponibel pa TPEF y ATA.

E compromiso ta pa tur e inversionnan cu ta wordo haci dilanti di e propiedadnan pa nan compromete nan mes pa haci e mantencion pa tur e añanan nos dilanti “ta un modelo nobo cu nos a scoge pa traha cune pa sector publico haci inversion y sector priva haci mantencion, esaki ta algo cu no tabata existi,” el a bisa.

Ayera anochi a tene luga un ceremonia caminda nan a firma un MoU entre Gobierno di Aruba, TPEF y tur e propiedad cu ta bay wordo beneficia cu embeyecemento aki na unda e inversionnan ta cuantioso pero tin biaha e mantencion ta mayor, segun el a afirma.

Di su parti, Ronella Croes CEO di ATA a expresa cu Eagle Beach ta e di cinco miho beach na mundo y di e di tres miho den area di Caribe segun TripAdvisor su Travelers Choice Awards di aña 2022, “esaki ta haci cu e sitio aki ta extra special.”

Di parti di ATA, conforme e maneho nacional tin diferente actividadnan y eventonan cu por wordo organisa mas riba un playa asina aki pa motibo di proteccion di un zona manera esaki, el a menciona por ehemplo, Aruba Beach Tennis cu ya caba a move na un otro luga debi cu a bin cu un maneho nobo pa brinda mas proteccion na tipo di areanan asina.

Ademas, el a menciona cu tanto TPEF cu Ministerio di Turismo tin dialogo pa loke ta trata bañonan publico y otro facilidadnan pa duna mas realce na Eagle Beach. A base anual, entre 5% pa 10% di gastonan di mercadeo ta bay na e producto turistico y e resto ta bay internacional na promocion di diferente mercadonan di Aruba.

Mario Arends miembro di directiva di TPEF a expresa cu for di 2010 cu a wordo funda nan obhetivo ta pa financia proyectonan pa mehora e producto turistico Aruba, TPEF ta haya su fondonan di Timeshare na Aruba pa loke TPEF ta bin dunando un contribucion importante.

Recientemente, nan a culmina e proyecto di Malmok boardwalk den su tres fase, renobacion di trapinan na Hooiberg, Museo Arkeologico y varios mas.

TPEF su areanan di enfoke ta di herencianan cultural, conscientisacion, siguridad, medio ambiente, inversion y atraccion.