Manera minister di Turismo y Salud Publico, Dangui Oduber a informa na maart ultimo, e proyecto di renobacion y embeyecemento di Baby Beach ta kedando cla. Recientemente riba su pagina di Facebook, DOW a comparti imagennan di e avancenan, unda ta mustra cu a cuminsa trabao di klinker y pone mata di coco.
Segun DOW a informa, e contratista ta cabando e ultimo detayenan di asfalt di e parkeerplaats. Tambe a cuminsa cu e trabao di pone klinker pa trottoirnan. Segun DOW, asina cu esakinan keda cla lo continua cu renobacion di e tenniscourt y tambe caba cu e trapi, cual a informa ta casi cla.
Igualmente a informa cu e matanan di coco a yega pa asina embeyece e area, y riba e potretnan por mira con a planta esakinan.
Na maart, Oduber a bisa cu e proyecto aki ta uno hopi importante cu ta forma parti di henter e masterplan cu tin den cuadro di e desaroyo hotelero den e area aki. Indicando cu Fase 2 di e proyecto di Baby Beach ta den pleno ehecucion.
E proyecto di Baby Beach Fase 2 ta acapara un area di 6000 m2.
Segun Oduber a bisa na maart, tur e proyectonan aki ta bay percura pa eleva henter e area rond di e playanan aki teniendo na cuenta e importancia di conserva nos naturalesa, creando asina un desaroyo di embeyecemento di e area na un manera sostenibel.
