Proyecto di digiboards na scolnan publico a finalisa na scol Xander Bogaerts

Durante un conferencia di prensa di minister demisionario di Enseñansa, Ciencia y Desaroyo Sostenibel Armando Rudy Lampe el a trece dilanti diferente topico, entre nan e finalisacion di e proyecto di digiboards na scolnan publico.

Asina Lampe a informa cu a termina di instala e ultimo digiboard na scol Xander Bogaerts cu tabata un proyecto bastante grandi pa ekipa scolnan publico na unda e scol aki tabata falta pa culmina cu e proyecto.

El a sigura cu esey tabata exigi un inversion grandi di e ministerio y ta p’esey cu nan tabatin un maneho pa wak na unda por haci uso di e placa cu no ta wordo usa eficientemente den enseñansa, re-ubica esey pa proyectonan di innovacion manera esaki cu ta bay beneficia e muchanan cu mester desaroya for di chikito nan ‘digital skills’.

Di mesun manera, Lampe a indica cu diaranson ultimo el a haci e reapertura di e conferencia Onderwijs Met ICT via e plataforma virtual GoMeet cu a wordo organisa for di Hulanda conhuntamente cu centenares di participante di paisnan di Reino Hulandes, el a splica cu na e reapertura el a mustra cu e parti di e realidad nobo aki ta cu no por imagina mas enseñansa sin ICT (Information, Comunication and Technology).

Segun Lampe, digitalisacion di enseñansa a bira obligatorio y cu no por bay back den sistema di antes, “e normalidad di antes ya no ta bay bin back”, Lampe a señala y aworaki e era digital a haci masha hopi cambio pa loke ta enseñansa.

Tambe, el a informa cu nan ta bezig cu un proyecto unda cu e hobennan ta bay siña welder pero di un forma virtual, “esey ta e futuro, nos tin cu siña nos muchanan y hobennan pa e era digital aki” y pa e motibo aki nan ta invertiendo den maestronan pa nan siña tambe loke ta e ‘digital skills’ pa por keda na haltura.

Lampe tambe a señala cu den ultimo lunanan el a presenta diferente fundacionnan y representantenan di ciudadano como e Fundacion Ban Yuda cu ta bin cu plataforma digital na unda nan ta bay forma un colaboracion pa scol Dornasol por bay usa un plataforma digital pa e alumnonan cu tin necesidadnan special.

“Nos ta aprecia cu ciudadanonan ta tumando e iniciativa aki”, el a bisa.

Di mesun manera, el a indica cu nan a presenta cu e representante di Cedes cu ta atende muchanan cu den e sistema tradicional nan lo a cay afo, eynan e muchanan cu tin cierto necesidad special Cedes ta cuida di nan.

Asina mes, tambe a presenta e Stichting Kids Creations Center cu a hiba pa Lampe un proyecto interesante cu ta yama Scol Amplio Nos Cosecha y cu segun el a afirma e ta responde exactamente na unda di e necesidadnan cu tin caba, nan tin un Peuterschool y un Kleuterschool cu ta bay acepta tur mucha cu ta cumpli 4 aña independientemente di ki luna el a nace, Lampe a bisa cu ta fundacion basa riba norma y balornan for di e tradicion catolico y cristian.

FEPA a uni na e fundacionnan aki cu tambe ta yena un bashi cu tin den enseñansa na Aruba, manera Lampe a menciona cu ora el a bira minister el a nota cu tin cierto cosnan cu no a bay bon y un di e luganan cu no a bay bon ta loke tabata e OAA, enseñansa di anochi cu tabata organisa tanto un MAVO como un programa di ofishi.

Den e rapport di accounting pa loke ta e maneho financiero Lampe a sigura cu tabata devastador na unda nan mester a interveni pa por coregi e iregularidad cu tabatin na unda el a afirma cu nan mester a haci cambionan pa evita cu den futuro por ripiti e mesun eror di pasado.

Pa e motibo aki nan a acerca un fundacion hopi respeta cu ta Stichting Avond Onderwijs Aruba (SAA)na unda nan ta entrega nan jaarrekening cada aña y cu nan ta demostra cu nan ta maneha e placa di pueblo di un forma serio, segun e mandatario a afirma.

El a bisa cu nan a acerca e stichting pa parti di e oferta loke ta middle Avond y Mavo Voortgezet Onderwijs ya cu nan ta ofrece e Avond pa nan behuur e parti ey y te aworaki esey ta bayendo conforme e exigencianan cu nan ta exigi di loke ta e respet pa placa di pueblo.

E otro parti ta e parti di ofishi cu ta keda realisa na EPB Hato y eynan nan ta haci uso di instalacionnan, maestronan, na unda ta mas cu logico cu nan a acerca e fundacion aki pa nan behuur e parti di ofishi di OAA.

Un situacion di fraude a wordo haya na Enseñansa pa Empleo, na unda cu pa añanan segun Lampe a indica tabatin un situacion di corupcion y cu nan a haci e denuncia na Landsrecherche, esey ta den investigacion ainda y cu na dado momento lo bin claridad loke a tuma luga eynan.

Pe motibo ey, Lampe a declara cu tin hende cu tabata forma parti di Enseñansa pa Empleo cu ta critica su persona y bisa cu mester a laga Enseñansa pa Empleo funciona manera e ta bin funciona for di añanan caba y pakico mester a haci cambio, “esey ta pasobra nan tabata parti di e problema y no a aprecia cu nos mester a haci e coreccionnan aki, pasobra bo no por laga abuso di placa di pueblo sigui tuma luga” Lampe a expresa.

Ta p’esey cu nan mester a interveni y pone in place un sistema unda cu ta evita cu e erornan aki di pasado bolbe ripiti, pa e motibo ey nan a busca colaboracion cu un fundacion cu ta FEPA pa esaki unda cu ta den ehecucion un acuerdo di cooperacion.

Tambe ta bin cu e iniciativa di Universidad di Pueblo George van Putten pa motibo cu segun Lampe esey ta bay enrikece e oferta educativo cu Enseñansa pa Empleo ta bay sigui na comunidad cu aworaki tin mas control no ripiti erornan di pasado.