Awe lo tin un reunion den comision parlamentario cu minister Otmar Oduber (POR), caminda e parlamentarionan kier a haya mas informacion tocante e proyecto di sortiamento di sushi of centro di reciclahe na Pos Chikito.

Aunke mundialmente tin un tendencia riba reciclahe y clasificacion di e materialnan pa recicla, manera plastic, carton y glas, ta existi reglanan di integridad y bon gobernacion, y nan ta trece su exigencianan segun parlamentario Edgar Vrolijk (MEP) . “Netamente integridad y bon gobernacion ta exigi transparencia,”, e di.

Intencion tras di esaki no ta pa trece polemica, y tampoco pa crea problema den gobernacion. Sino cu solamente e ta eherce su rol di control como parlamentario. E ta kere cu pueblo kier haya sa si e procedura a cana. El a bisa Bon Dia Aruba cu no ta un duda e tin, sino cu e ta boga pa e transparencia cu e proyecto aki mester cana.

E tin varios pregunta pa formula e mandatario rond di e proyecto aki. Un di nan ta si el a cumpli cu tur ley prome cu a dicidi di instala y huur e instalacion aki pa Serlimar. E prome punto tin di haber si e mandatario a cumpli cu e reglanan di verordening prome cu a dicidi di bin cu e proyecto caminda el a bini. “Pueblo tabata sa caba delanta? El a sali den corant?,”, el a puntra. Pa asina nan por expresa pa kico nan ta contra di e tipo di proyecto aki den nan bario residencial.

E tipo di proyecto aki mester a sali den prensa pa duna pueblo dianan pa nan por tene cuenta cu esaki. Otro pregunta tin di haber si e proyecto aki tin un estudio di impacto, entre otro kico ta e molester y desordo pa e bario aki. Tambe si nan a cumpli cu e ley di comptabilidad ya cu ora ta trata di huur di edificio e mester pasa e proceso di destaho publico. E ta haya cu tur esaki ta forma parti di e concepto di transparencia den gobernacion, y nan ta cosnan cu nos pueblo mester por sa. “E proceso ey mi ta haya su falta”, el a bisa.

Parlamentario Vrolijk a reitera cu como parlamentario e kier sa con e proyecto aki a wordo hinca den otro. Pero pueblo mes lo desea sa tambe, specialmente esunnan cu ta biba rond di e localidad aki. Den su concepto e parlamentario ta haya cu nan mester bin cu ne den un area industrial. Pero e ta haya cu e mandatario ta esun cu tin cu splica si nan a sondea otro opcionnan y dicon e luga cu a wordo scogi ta esun ideal. E no kier bay den polemica pero si e ta kere cu e minister den cuestion ta esun cu mester contesta e preguntanan aki.

El a bisa cu na Hulanda e tipo di reunion den comision parlamentario ta uno habri, pero ainda den parlamento di Aruba ainda e ta cera. E ta kere cu mester bin cu un cambio unda nan por crea un espacio unda pa ehempel e bario interesa unda e proyecto aki mester bin pa scucha kico e ta. E ta forma di transparencia y integridad. Ya cu den principio e habitantenan di e area aki ta esunnan cu den principio mester carga e proyecto aki tambe. El a pasa e experiencia aki den su propio cuero di tur e proceso ora cu gobierno anterior a trata di bin cu un dump na Santa Cruz. E tipo di proyecto cu por crea problema medio ambiental mester tin un estudio di impacto ambiental. Te hasta pa stipula un orario riba e tipo di actividad aki den bario.

“Siguramente ora cu bo ta haya keho di pueblo…. nan tambe tin preocupacion y mi tambe comparti e mes preocupacion”, segun e parlamentario. El a trece esaki dilanti ya cu regla di bon gobernacion ta indica cu tin decision manera esun cu e mandatario a dicidi di huur e mesun edificio unda antes DTI tabata keur auto na Pos Chikito. E edificio aki lo sirbi Serlimar como centro di operacion pa e proyecto di sortiamento di sushi unda mester cumpli cu e reglanan aki. Un regla ta cu e decision aki mester ta transparente. Pero tambe mester splica pueblo con e mandatario a yega na dje, kiermen si el a cumpli debidamente cu e procedura exigi.

E ta consciente cu na Aruba nos tin un problema grandi cu maneho di sushi y problematica di dump. E ta spera cu pa 2030 , Aruba tin cu bay pa resolve e problema di sushi di un forma structural.

Y aunke como fraccion nan ta parti di e coalicion cu ta sostene gobierno, pero e ta haya fundamental pa bin cu un cambio den politica. Ademas ta nan esunnan cu a firma pa bin cu mas integridad den gobernacion. Pero si como miembro di parlamento e ta percura pa tur cos cana manera debe ser. E ta haya cu esaki tabata un motibo pakico pueblo a pidi un cambio den gobernacion pa bin cu mas transparencia. “Unico cos cu nos ta pidi di e gobernantenan e transparencia, nada otro”, e di.