Prome Minister Evelyn Wever-Croes recientemente a duna un actualisacion riba dos proyecto importante di Ministerio di Infrastructura hunto cu DOW, esta e proyecto di e caretera di Avenida Milio Croes na Dakota y e proyecto di e caretera di High Rise Hotels.
Prome Minister ta menciona cu e ta contento di por mira cu e caretera di Avenida Milio Croes ya ta kedando cla. Esaki siendo un area di acceso importante di Aruba, cu hopi comercio y di hopi trafico, e caminda nobo sigur lo trece un alivio grandi na e usuarionan.
Referiendo na e proyecto di e caretera di High Rise Hotels, Prome Minister ta splica cu e proyecto ta parti den 3 fase ya cu no por cera e area completamente pasobra mester tin acceso na e hotelnan. E prome fase ya ta finalisando y esaki den e periodo planifica. E mandatario ta sigui bisa cu e ceramento di e caminda durante e ehecucion di e proyecto por causa molester principalmente na e taxistanan. Pero na final di e proyecto tur usuario lo bay goza di un bunita caminda cu acera nobo y cu landscaping y iluminacion moderno.
Manera ya ta conoci debi na e pandemia Gobierno mester a para tur inversion den careteranan pa duna prioridad na e pueblo di Aruba y inverti pa salba bida di hende, salba nan trabounan y salba companianan. Pero awo cu den e presupuestonan di añanan 2023 y 2024 tin surplusnan, a crea espacio financiero y aloca fondo pa traha y drecha careteranan di Aruba.
Den un comunicado di prensa, prome minister a bisa: “Aruba henter por ta satisfecho y orguyoso di e proyectonan aki. Despues di completa esakinan lo sigui cu demas caretera cu mester atencion urgente. Mi ta gradici DOW y tur nan trahadonan pa nan valioso trabou. E careteranan aki tawata den masha mal estado y tawata un crisis riba nan mes, y mescos cu otro crisis, nos a cera cabes, bin cu solucion, traha duro, y awor nos ta solucionando esaki tambe. Nos no por soluciona tur problema pareu, pero poco poco y sigur nos ta logrando si!”
