Proyecto di astronomia pa mira transito di planeta

Dialuna 11 di november scol EPB unda cu studiante a haya oportunidad pa observa ‘transito di Mercurio’ cu ta un transito di e planeta Mercurio cu por ta visibel pa via un telescop.

Jeremy Maduro, Presidente di Space & Nature Aruba Foundation y docente di EPB Hato, a comparti cu muchanan a haya un splicacion y les cortico tocante kico un transito ta y con nan por descubri otro planeta na otro solo.

Despues di esey, e muchanan a bay pafo y por a wak via un telescop con e transito a sosode. Maduro a splica cu un transito ta ora cu un planeta ta pasa dilanti di solo, anto tapa esaki. “Por wak un punta preto dilanti e solo.”

Segun Maduro ta amplia cu esaki no ta pasa regularmente, e ta sosode pa planeta Mercurio cada 14 aña. E siguiente lo ta pa 2032 cu lo por mira desde Aruba atrobe. Manera e planeta Venus, su siguiente transito ta bay ta aki 100 aña, anto e ta fenomenonan celestial ‘inusual, cu no tur ora nos ta haya chens pa wak nan’.

Pa por obtene mas informacion riba NASA online, pa motibo cu e fundacion ta miembro di International Astronomical Union, unda cu nan a bin cu tarea di astronomia na scol.

Nan a pidi pa dia 10 te cu 20 di november haci un actividad di astronomia. Maduro, como docente di EPB, a haya e oportunidad pa haci’e eynan mes. “Na prome instante, e studiante tabata skeptico, pero unabes cu nan a wak via telescop nan a gusta. Nan a cuminsa puntra mas y a nota entusiasmo den nan. Tin di nan cu ta prome biaha nan ta wak den telescop.”

E ta expresa cu tabata algo exitoso pa haci. Pa locual ta trata e fundacion, e ta bisa cu hende por pasa riba nan pagina di Facebook y website www.spacestationaruba.com pa vota pa un nomber local pa un ‘Exoplanet’.

Nan por scoge di 11 nomber cu ta preselecta pa pueblo di Aruba por vota pa un di nan. Esey lo bira un nomber pa un planeta pafo di sistema solar cu ta bay haya e nomber na Papiamento.

Maduro ta splica cu pa e fundacion mes y pa algun actividad cu ta tuma luga den Parke Nacional Arikok pa e aña aki no tin mas actividad y tur ta schuif pa januari caminda lo tin e exposicion y anuncio di e nomber hunto cu evento.

Segun Maduro ta bisa cu cada bes tin mas interes den comunidad pa sa mas tocante astronomia y espacio. Unda cu nan ta haya nan mes obligatorio pa busca boluntario y un input pa educacion, nan ta trahando riba documento pa por yega asina leu.

“Nos mes ta bezig siñando pa wak con tur cos ta bay. Unabes nos ta cla nos ta bay dilanti. Pa cada hende cu kier mas informacion, por tuma contacto cu nos riba Facebook of check informacion. Te ainda nos ta bezig pa duna guia na mucha cu tin cualkier proyecto di Natuurkunde, sea pa observacion di strea of cualkier cos den espacio. Cu grupo di scouting y con pa uza telescop, nos ta yuda cu esey tambe”, el a expresa.