Recientemente e proyecto di agroforesteria sintropico a yega Scol Primario Kudawecha. Boluntario-, mayor-, mucha- y trahadonan di e organisacionnan encarga cu e proyecto a traha na e scol pa asina finalisa e proyecto cu tin como meta stimula e futuro generacionnan ariba e importancia di agricultura.
E proyecto di agroforesteria sintropico ta un proyecto unda e scolnan cu ta participa ta ricibi sosten tanto for di Santa Rosa Aruba y Living Soil, como tambe for di Gobierno di Aruba pa desaroya un hardin cu ta provee alimentacion y asina inculca e balor pa agricultura den e futuro generacion pa medio di tecnicanan sostenibel.
Aña pasa dia 1 di november Gobierno di Aruba a lansa e proyecto aki y a lansa e plataforma cu a duna oportunidad na e scolnan basico pa registra y participa na e proyecto aki. Dia 18 di januari a traves di un conferencia di prensa Minister Ursell Arends a anuncia e inicio oficial di e proyecto y e prome scol cu a ricibi e hardin di alimentacion, cual tabata Scol Basico Washington.
Den fin di siman Scol Primario Kudawecha a bira e di dos scol cu a ricibi e hardin di alimentacion cu e proyecto di agroforesteria sintropico. Un total di 13 scol ta forma parti di e proyecto aki, 13 scol basico y tambe IPA.
E scolnan basico cu ta bay ta participando den e proyecto di agroforesteria sintropico ta Scol Basico Washington, Scol Primario Kudawecha, Colegio Hilario Angela, Colegio Conrado Coronel, Pius X School, Scol Caiquetio, Sint Paulus School, Play2Whizz Campus, Scol Basico Dornasol, Scol Paso pa Futuro, Mon Plaisir School y Grof Van Zinzendorf.
