Cu eleccion hopi cerca, diputadonan Guatemalteco a cende un candela di critica ora di reactiva un proyecto di ley cu ta busca endurece e castigo pa aborto y cera tur caminda legal pa matrimonio entre persona di mesun sexo.
E iniciativa polemico, titula Ley pa Proteccion di Bida y Famia, ta mantene un pulso na Congreso entre grupo conservador y defensor di derechonan humano, den pleno campaña electoral pa e eleccion general dia 16 di juni proximo.
Anibal Rojas, di e partido derechista Vision cu Balornan (VIVA), a sigura cu e ‘ideologia ey ta bin for di stranhero’ cu ta pretende ‘degrada’ e sociedad pa introduci tema manera ‘aborto y matrimonio homosexual’.
E proyecto a ser presenta na 2017 y a supera dos votacion den e pleno legislativo, e ultimo tabata na augustus di aña pasa. Y a reaparece den agenda siman pasa pa su discusion na su di tres debate, bou peticion di gruponan religioso.
Organisacionnan opuesto na e iniciativa a convoca un protesta pa diaranson pasa.
Su aprobacion ta rekeri di e mita mas un di e 158 congresista, y Rojas a sigura cu ta conta cu 80% di respaldo, ‘talbes un tiki mas’, di parlamentario.
E otro banda di e controversia ta e iniciativa ta pa hancra den Codigo Civil e prohibicion definitivo di matrimonio gay.
Pa via cu e iniciativa a reaparece, e Procuraduria di Derechonan Humano a recorda Congreso di e compromisonan internacional cu Guatemala a adkiri, ‘pa abstene su mes’ di promove leynan cu ta atenta contra e principio di no discriminacion y igualdad den e ley.
Tambe e proyecto aki a prohibi scolnan publico y priva di promove programanan riba diversidad sexual of ‘siña manera normal e conducta sexual distinto di heterosexualidad’.
