Minister Glenbert Croes (MEP), conhuntamente cu su team di Special Projects a introduci e proyecto titula Ban Cultiva recientemente.

E team ta consistiendo di Susanne Sintjago y Thanya Croes. Meta di e proyecto aki ta uno simpel, pero cu lo trece gran resultado pa henter nos comunidad, segun e comunicado cu Bon Dia a ricibi di gobierno.

“Meta ta pa hunto nos cultiva norma, balor, respet pa otro y hermandad den comunidad, como tambe cultiva bienestar personal ariba e tereno social, fisico, emocional, spiritual, intelectual, financiero, su medio-ambiente, y ocupacion”, minister Croes ta splica.

Den e vision Social Laboral di minister Croes, e ta mira un reactivacion total di tur e centro di barionan existente, e comunicado ta sigui bisa. Den su vision ‘e ta mira e facilidadnan como e centro di encuentro, centro di apoyo, centro di respaldo, centro di informacion pues un centro comunitario pa e comunidad’.

Cu esaki den mente, Ministerio di Asunto Social y Labor a inicia e proyecto aki cu un serie di 8 curso pa tur e directivanan di e Centronan di Bario. Cursonan ta keda ofreci pa Bruce Harms, instruyendo e directivanan con maneha y saca maximo cobertura di nan pagina di Facebook y otro tecnicanan di mercadeo digital. Siman pasa a haci entrega di e prome certificado na tur cu a participa.

E proximo fase di e proyecto aki ta diferente anochinan di informacion y actividad na Centronan di Bario cu ta consisti di participacion y colaboracion di diferente Ministerio. Ministerio di Salud lo enfoca riba movecion y salud. Ministerio di Enseñansa lo informa tocante tur e diverso cursonan cu Enseñansa pa Empleo ta ofrece comunidad.

DPL lo ta presente specialmente pa esunnan cu ta buscando un trabou, pa nan por inscribi pa drenta den e proceso di biaha. Tur esaki y hopi mas reparti den 8 diferente diasabra.

E proyecto aki ta pa reenforsa importancia di Centro di Bario, crea consciencia entre ciudadanonan riba e importancia di un comunidad participativo. E meta cu kier logra ta un miho comunicacion entre centro di barionan y instancianan gubernamental y no gubernamental.

“Mi kier stimula conscientisacion bou di ciudadanonan cu ta biba den cada un di e barionan riba e importancia di nan participacion activo den nan centro, pues creando un comunidad participativo”, e minister ta finalisa.