Despues di un prome fase exitoso e proyecto di agroforesteria sintropico ta den pleno fase dos y diferente localidad a ricibi of ta preparando pa planta nan hardin di alimentacion. Durante e prome fase e proyecto a enfoca riba scolnan basico, den e di dos fase aki aki e proyecto a amplia y tur instancia social, scol secundario, centro di bario y comunidad di bisindario por participa.
Recientemente Living Soil Aruba hunto cu Santa Rosa tabata na Bureau Orthopedagogisch Centrum pa asina instala un hardin di alimentacion. Anteriormente e scol secundario SPO Brazil tambe a cuminsa su hardin di alimentacion y pronto Club Kibrahacha tambe lo ta yamando nan hardin di alimentacion bon bini den fin di siman venidero.
E proyecto di agroforesteria sintropico ta un proyecto unda cu e scol of organisacionnan cu participa ta ricibi sosten tanto for di Santa Rosa Aruba y Living Soil Aruba, como tambe for di Gobierno di Aruba pa desaroya un hardin cu ta provee alimentacion y asina inculca e balor pa agricultura den e futuro generacion pa medio di tecnica sostenibel.
Desde januari 2024, cu e proyecto a inicia a oficialmente, te na final di aña escolar 2023-2024, 11 scol basico a logra ricibi nan hardin di alimentacion. E scolnan aki ya caba ta mirando e fruto di e trabao y ta cosecha nan propio fruta y berdura.
Durante e aña escolar 2024-2025 mas scol basico, secundario, centro di bario y comunidad di bisindario tin e oportunidad pa realisa nan propio hardin di alimentacion tambe.
Un cambio cu tin den e di dos fase aki di e proyecto ta cu pa e aña escolar nobo cada scol lo tin un specialista conecta cune, cu lo train por lo menos un miembro di e staf den e enfoke holistico di Agroforesteria Sintropico.
Mantencion di un hardin di alimentacion ta rekeri di un enfoke holistico cu ta inclui varios practica clave. E diferente practica aki ta importante pa por mantene e hardin di alimentacion lo mas optimal posibel pa e fruta y berduranan por crece efectivamente.
A tuma e decision aki despues cu Living Soil Aruba a publica ariba nan pagina di Facebook, den luna di juli, cu despues di a haci un bishita na scolnan cu a ricibi nan hardin di alimentacion, a tuma nota cu e mantencion di e hardinnan no tabata manera debe ser.
Cu e cambio aki nan lo sigura cu e hardinnan di alimentacion ta prospera y sigui ta un recurso educativo di balor.
