Ayera tardi durante un conferencia di prensa, Daylan Krozendijk y Ferdinand Franca, dos profesional den e tereno di teatro, conhuntamente cu Jeugdtheaterschool Drazans di Corsow, a anuncia e proyecto ‘25 Hours of Theatre’.
E proyecto ’25 Hours of Theatre” lo ofrece e hobennan, entre 13 y 18 aña di edad, amante di teatro, e oportunidad pa engrandece nan conocemento teatral como tambe yuda nan den nan proceso artistico y profesional.
Durante e proyecto aki e participantenan lo tin 25 ora pa traha riba un presentacion di teatro. E hobennan lo ricibi guia profesional di coach-, maestro- y directornan di teatro, tanto nacional, regional y internacional.
E manera cu e proyecto ta diseña ta cu e participantenan lo wordo parti den diferente grupo y lo haya un tarea specifico pa traha cune. E intencion tras di esaki ta pa duna e hobennan e oportunidad di bin cu nan mesun creacion, prepara un obra for di cero y traha cu otro hobennan, y siña habilidadnan di bida, manera comunicacion, creatividad, entre otro. Na final nan lo presenta nan producto/ presentacion teatral na publico en general.
E meta di e proyecto ’25 Hours of Theatre’ ta pa prepara e hobennan den nan formacion teatral y asina continua cu e disciplina aki di arte. Debi na e exito di ‘20 Hours of Theatre’, cual a tuma luga aña pasa, tanto Franca y Krozendijk tin e deseo pa continua cu tipo di proyecto- y programanan asina y a traves di esakinan engrandece e arte di teatro na Aruba.
“Nos enfoke ta nos hobennan cu mester sigui mantene e disciplina di teatro bibo pa e siguiente generacion. Nan lo ta nos futuro lidernan cu mester continua cu e bunita forma di arte aki,” nan a enfatisa.
